वरिष्ठ सरोद बादक मोहनसुन्दर श्रेष्ठ

शीला साय्मि
जन्म बिउम्हेस्यां हे कर्म नं बी धइगु ज्याथजिथिया धापूयात सार्थक याःपिं व्यक्तित्वपिं मध्ये छम्ह खः नांजाःम्ह सरोदबादक मोहन सुन्दर श्रेष्ठ। नेपाःया हे उत्कृष्ट सरोद बादक जुयादीम्ह वय्कलं च्यादँया वैशंनिसें थ्व ख्यलय् पलाः छिनादीगु खः। मदुम्ह शास्त्रीय गायक भक्तकृष्ण मानन्धरयाके न्यादँ तक प्रशिक्षण कयादीम्ह श्रेष्ठं धयादी, 'मेमेगु प्रशिक्षण स्वयां सरोद प्रशिक्षण भचा थाकु।' झिंन्हय्दँया वैशय् वरिष्ठ सितार व सरोद बादक नारायणप्रसाद श्रेष्ठयाके नं प्रशिक्षण कयादीम्ह वय्कलं न्हापा भोकल हे सयेकेगु कुतः यानादीगु खः। अथे नं भोकलय् स्वयां सरोद थायेगुली हे पलाः न्ह्याकादिल। थ्व ख्यलय् वय्कः सफल जक जुयादीगु मखु नेपाःया हे छम्ह ज्वः मदुम्ह सरोद बादक जुयादिल।
क्लासिकल म्यूजिकय् दखल दुम्ह वय्कःया गलाय् नं मिठास दु। गुगु मिठासय् न्यँमिपिंत मोहित यायेगु शक्ति दु। उलि जक मखु, सूर, ताल, लय, राग व दक्वं मात्रा मिले याये फुगु अद्वितीय क्षमता नं दु।
आपालं ख्यलय् थःगु प्रतिभा न्ह्यब्वयादीधुंकूम्ह वय्कलं सोल्टी, हायात, सांग्रीला थेंजाःगु ततःधंगु होटलंनिसें इहिपा, बुदिं, सौखिनपिनि इनापय् नं थःगु प्रतिभा न्ह्यब्वयादी। अथे हे विशेष यानाः स्वदेशीया ग्वसालय् जुइगु थीथी ज्याझ्वः, ग्वेथे इन्ष्टिच्यूट, फ्रान्सेली सांस्कृतिक केन्द्र, अमेरिकन पुस्तकालय, नेपाल टेलिभिजन लगायत आपालं थासय् थःगु प्रस्तुति बियादी धुंकूगु दु।
वि.सं. २०४२ सालंनिसें स्वीदँतक जुजु वीरेन्द्रया इनापय् राज दरबारया स्थायी जागीर नं नयादीम्ह वय्कः थौंकन्हय् रिटायर जूसां जुयादी धुंकूसां पेन्सनं थःगु जीविका हना च्वनादीगु दु। वि.सं. २०१७ सालंनिसें नीदँतक राष्ट्रिय नाचघरय्, वि.सं. २०२१ सालंनिसें रेडियो नेपालय् ज्या यानादीम्ह वय्कः वि.सं. २०२८ सालंनिसें थौंतक नं होटल डिएल अन्नपूर्णय् ज्या यानाच्वनादीगु दु। द्यःप्रति अतिकं आस्था दुम्ह वय्कलं वि.सं. २०४९ सालंनिसें नारांहिति भजन खलःया ग्वसाः ग्वयाः संल्हू व एकादशि पतिकं भजन हायेकेगु यानादी।
गोरखादक्षिबाहु २०३२ सालं राजदरबारय् जूगु ज्याझ्वलय् स्पेनया जुजुपाखें वि.सं. २०३४ सालं पदक, त्रिशक्ति पट्ट २०४२, सार्क सम्मान पदक २०३४ यालिसें वय्कलं आपालं सेवा पदक नं त्याकादीगु दु। थुकिया लिसें वि.सं २०३७ सालं रत्न रिकर्डिङ संस्थानपाखें सरोद बादनया क्यपूनेट नं प्रकाशित जूगु खः। शान्त स्वभावम्ह वय्कः न्ह्याम्हसितं ग्वाहालि यायेत उलि हे तत्पर जुयादी। थम्हं फुगु चाःगु न्ह्यागु कथं व न्ह्याम्हसितं ग्वाहालि यायेगु बानी दुम्ह वय्कः थःगु देय् व भाय्प्रति उलि हे समर्पित जुयादी। विदेश वनेगु ह्वःताः तःक्वःमछि हे चूलाःगु खःसां नं थःगु मातृभूमि धाःसा त्वःता मदी।
नेवाः भाय्या एफएम फुक्क धइथें न्यनादीम्ह वय्कःयाके गुगु एफएमय् गुगु इलय् छु ज्याझ्वः न्ह्याइ धकाः फुक्कं हे लुमं जू। नेवाः म्येँ सि.डि. नं पिहां वक्व हे न्यायेगु व न्यनेगु बानी दुम्ह वय्कःया स्मरण शक्ति नं तसकं हे बल्लाः। छक्वः न्यंगु म्येँ हाकनं न्यनाच्वने म्वाः। थौंकन्हय् धाःसा उमेरं मबियाः खः वा मनूतय्गु भीडं यानाः खः न्हापा थें वय्कःया स्मरण शक्ति उलि तिख्खर मजू। न्यासि वनेबलय्, मोटरसाइकल गयेबलय् गन थ्यन, छु जुयाच्वन धइगु खँ बांलाक हे धायेफु। थ्व वय्कःया छगू विशेषता नं खः।
बहनी झिंछताः इलय् शान्त वातावरणय् अभ्यास यायेगु वय्कःयात साप यः। सरोदनापं हार्बिन नं थायेगु यानादीम्ह वय्कः थःत यःयःगु म्येँ थम्हं हे क्यासेट, सि.डि. प्ले यानाः हायेकेगु, न्यनेगु व अभ्यास यायेगु व स्यनेगु नं यानादी। आपालं स्वदेशी व विदेशी चेलात दुम्ह वय्कलं छम्ह अमेरिकनयात ला स्वीदँतक नं प्रशिक्षण बियादीगु खः।
अप्वः राजदरबारय् वनेगु यानादीम्ह वय्कः थौंकन्हय् नं जन्मन्हि पतिकं वनेगु यानादी। थुकिया दथुइ वय्कलं धयादी, 'ध्यबा दतले जक मखु दुःखं कःगु इलय् नं साथ बी फःसा जक मनू जुयागुया सार जुइ।'
छता ला पिहां जुइत पासा माः अले थौंकन्हय् न्हापा थें लँय् जुइ अःपु मजूगुलिं म्वायेकं म्वायेकं पिहां झायामदी। जन्म बिउम्ह मांया गुण ल्वःमंके मफुम्ह वय्कलं थः मामं हालदीगु तुतः छत्वाःचा जक जूसां रेकर्ड यानादीगु दु। 'मांया लुमन्ति वल कि वहे रेकर्ड न्यनेगु याना' वय्कलं धयादी।
थः मांबौंपिंसं बूगु खुला लिपा मिखां मखंगु धाःसां नं वय्कलं धयादी, 'खुला लिपा सुनां खंगु दु? जि जन्मजातं हे दृष्टिविहीन खः।' थःत आखः ब्वनेगु ह्वःताः चूमलाःगुलिं तसकं नुगः मछिंकादीम्ह वय्कलं दकलय् न्हापां द्वारिकाप्रसाद मिश्र पाखें भजन स्ययेकादीगु खः।

More Stories Like this