हाकनं शुरु जूगु बन्द हडताल

कृष्ण प्रजापति

पर्यटन वर्ष ज्वःछि बन्द व हडताल यायेमखु धकाः तिंख्यलं याःगु प्रतिबद्धताया अःखः नेपाली कांग्रेसया भातृ संगठन नेपाल तरुण दलं म्हिगः नेपाल बन्द यात। खँ छता छता ज्या मेता मेता यायेगु राजनीतिक दलया पुलांगु चलनयात हाकनं छक्वः नेपाली कांग्रेस थेंज्याःगु तःधंगु राजनीतिक दलं कायम यानाबिल। मनू सीवं हे सहिद घोषणा यायेमाःगु गलत सोचं आश्रय काइ धकाः थज्याःगु हुलदंगाय् सीपिंत सहिदया मान्यता बी मजिउ धइगु थीथी राजनीतिक दलया दबावयात स्वीकार यानाः सरकारं उकथंया हे निर्णय यायेवं विरोध स्वरुप थ्व बन्द आह्वान याःगु खः। थुकिं यानाः नेपाली जनताया जीवनयापन ला कष्टकर जु हे जुल नाप नापं अन्तर्राष्ट्रिय जगतय् नं नेपाःया छबि स्यनीगु स्थिति वःगु दु। छाय्धाःसा अमेरिकी सरकारं आः नकतिनि हे जक झीगु देशय् आः शान्ति सुब्यवस्था सुरु जुल धकाः थःपिंसं न्हापा जारी यानातःगु निषेधाज्ञा लित काःगु खः। न्हापा अमेरिकां थः नागरिकतय्त नेपाल तसकं असुरक्षित थाय् जूगु ल्याखं थन भ्रमण याये मते व भ्रमण यायेगु हे खःसा सचेत जुयाः जक या धकाः उर्दी जारी यानातःगु खः। थज्याःगु सचेतना नालेगु उर्दी लित काःगुया छुं ई लिपा हे नेपाल बन्द जूवंगु इलय् विदेशय् झीगु देशया छबि गथे जुइगु खः?
बन्द हडताल धइगु अन्तिम अवस्था वयेवं वा मेमेगु विरोधया ज्याझ्वःयात सत्ता पक्षं छुं ध्यान मतल धाःसा अन्तिमय् वयाः याइगु विरोधया लँपु खः। तर आः ला हरेक राजनीतिक पार्टीं दकलय् अःपुगु व दंगु लोकप्रिय विरोधया ज्याझ्वः कथं हे थ्व बन्द हडतालयात नालाच्वंगु दु। खयेत ला कारागारय् जूगु ल्वापुइ तरुण दल चितवनया अध्यक्ष शिव पौडेल जक मखु मेमेपिं नं आपालं मनू घाःपाः जूगु खः। उगु हुलदंगाय् लाःपिं सकसितं सरकारं क्षतिपूर्ति बीगु कथं याःगु निर्णय पाय्छि नं खः। तर उच्चस्तरीय न्यायिक आयोग नीस्वनाः सीम्हेसिया परिवारयात झिगू लाख दां बीगु कथं याःगु निर्णययात हे माने मयासे तरुण दलं बन्द आह्वान यानाः सहिद हे घोषणा यायेमाःगु जिद्दी यानाच्वन। म्हिगः माओवादीं थीथी इलय् थीथी कथं सीपिंत तकं आन्दोलन व युद्धय् सीपिं थें हे सहिद घोषणा याःगु इलय् तःधंगु विरोध प्रदर्शन याःपिं तरुण दल व उमि मातृ पार्टी नेपाली कांग्रेसं आः थः छम्ह कार्यकर्ता ल्वापुइ लानाः उपचारया झ्वलय् सीगु इलय् अज्याःगु हे त्वहः दयेकाः बन्द हडताल थेंज्याःगु जनजीवनय् हे तःधंगु लिच्वः लाइकथंया राजनीतिक ज्याझ्वः पित बियाः सरकारयात दवाव बीगु ज्या गुलित पाय्छि खः? छम्ह बन्दीयात जेल दुने वडबडी यात धाःसा गोलघरय् तयेगु लिसें थीथी कथंया सजायू बीगु बन्दीगृहया नियम दु। तर जेल दुने जूगु उगु गडबडीयात छुं हे मखुथें च्वंक उमिगु मुद्दा तकं लित कायेमाःगु व वयात सहिद घोषणा यायेमाःगु माग स्वयम नेपाली कांग्रेसं यानाच्वंगु दु। थथे मेपिंत जूसा सहिद घोषणा याये दइ मखु धकाः पं वनेगु अले थःपिंत जूगु इलय् सहिद घोषणा मयासें मजिउ धायेगु दोहोरो भूमिका हे खः ।

वंगु सनिवाः घाःपाः जूम्ह तरुण दल चितवनया अध्यक्ष शिव पौडेल अस्पतालय् वासः याकुयाकुं मदयेवं हे छझाः अपर्झत बन्द याये धुंकूगु खः। अज्याःगु बन्द हडतालं कायल जुयाच्वंपिं नेपाःमि जनताया भावनायात थुइकाः चितवनय् दुगु खुगू राजनीतिक पार्टीं दवाव स्वरुप मदुम्ह शिव पौडेलयात सहिद घोषणा मयायेत व बन्द लित कायेत सम्बन्धित पक्षयात इनाप याःगु खः। तर बन्दया पक्षपाति नेपाल कांग्रेसं दच्छि न्ह्यः तिंख्यलं थःपिंसं हे सार्वजनिक रुपं सारा जनताया न्ह्यःने बन्द हडताल याये मखुत धकाः यानागु बचंयात हाचां गायाः हे थ्व ज्या यानाक्यन। उकियात नं नेपाली जनतां छगू ल्याखं याये मखुत धाःगु छाय् यात धकाः न्ह्यसः थनाच्वंगु दु। बन्द हडतालं गन गुलि नोक्सान जुयाच्वनी धइगु आपालं मनूतय्सं सिउगु हे खँ खः। बन्द हडतालं यानाः ब्वलनीगु तनावं जुइगु धनजनया क्षतिया खँ ला अलग्ग हे दनि। २० गते जूगु ल्वापुइ लानाः सीम्ह तरुण दल चितवनया अध्यक्ष शिव पौडेल सीवं भरतपुर विमानस्थल व सप्तगण्डकी क्याम्पसय् जूगु तोडफोडया भर्त्सना यायेगु बांमलाःगु खँ नं मखु। तर उकियात हे त्वहः दयेकाः याःगु तरुण दल व नेपाली कांग्रेसया थ्व बन्द ज्याझ्वलं अवश्य नं झीगु सहज रुपं न्ह्याये धुंकूगु संविधान लेखन व शान्तिपूर्ण वातावरणयात लिच्वः लाकी ।

अःपुगु माध्यम कथं बन्द हडतालयात प्रयोग यायेगु नेपाली राजनीतिक दर्शन हे बांलाः मजू धइगु लिपांगु इलय् वयाः सीदु। छखे जनजीवनय् लिच्वः लाकीगु, मेखे तमाम नेपाली जनतायात त्रासपूर्ण वातावरणय् तइगु अले तोडफोड व क्षति नापनापं गलत संस्कारं टायर च्याकीगु कारणं दीर्घरोगी तकं अप्वयेकीगु थेंज्याःगु बन्द हडतालयात सदांया लागिं बन्द हे यानाछ्वयेगु थीथी राजनीतिक पार्टीया प्रतिवद्धता व जनताया आह्वान ताःलाये फयाच्वंगु मदु। न्हापां थःपिंसं हे उल्लंघन यायेत अज्याःगु प्रावधान दयेकेगु यानाच्वंगुलिं यानाः थज्याःगु बांलाःगु हे जनताया हीतय् जूगु आपालं निर्णयत ब्यावहारिक प्रयोगय् मवयाच्वंगु खः। झीगु देशय् न्ह्याबलें दंगु लोकप्रियता हे जक कमे यायेत स्वइगु जुयाः नं थज्याःगु गडबडीत कायम जुयाच्वंगु खः। छुं नं हडताल यायेमखु याकेमखु धइगु छगू मान्यता ज्वनाः न्ह्याःवनेगु हे शान्तिपूर्ण सहअस्तित्वय् म्वायेगु चलन खः। छु राजनीतिक पार्टीतय्सं थज्याःगु बांलाःगु खँ ल्हायेगु अधिकार तक हे कुण्ठित यायेत स्वःगु तायेकेगु पाय्छि खःला? बन्द व हडताल बाहेक अनेक कथंया मेमेगु नं दबावमूलक ज्याझ्वः नं ला दु नि ।

खँ न्ह्याथे हे जूसां लासय् राजनीति यायेगु चलन दत्तले झीगु देशय् छगू पक्षं बन्द हडताल बन्द यायेमाः धाःसां मेमेगु पक्षं उकियात उल्लंघन यानाः वा मेमेगु तरिकां जूसां थ्व ज्याझ्वःयात हाकनं प्रश्रय बीगु आपालं सम्भावना दु। अथे जुयाः नं भौतिक व मानवीय क्षतिया तकं सम्भावना दुगु थज्याःगु बन्द हडतालयात सदांया लागिं हे बन्द यायेगुपाखे सकसियां ध्यान वनेमाल। अले जक न्हूगु संविधान इलय् जारी यानाः दीर्घकालीन शान्ति व मैत्री कायम यायेगु लँय् झी नेपाःमि सकलें न्ह्यःने वने फइ। थ्व हे ईया माग नं खः ।

More Stories Like this