रेडक्रसया कम्पोनियन मेसिन स्यनाः ल्वगित मर्काय्

ख्वप(सन्ध्या टाइम्स)/ नेपाल रेडक्रस सोसाइटीया जिल्ला शाखा ख्वपय् च्वंगु थीथी ल्वय्या निंतिं मदयेक मगाःगु हि तुयुकेगु व कम्पोनियन यायेगु मेसिन प्यला न्ह्यवंनिसें स्यनाच्वंगु दु। थुकिं यानाः हिया ल्वगित मर्काय् लानाच्वंगु दु। मनूतय्गु हियात निगू कथं तुयुकीगु प्लेटलेट अर्थात् पिआरपी व प्लाज्मा अर्थात् एफएफपी हि दयेकेगु ज्याय् उगु मेसिन छ्यलाच्वंगु दु। न्हिं करिब ५० निसें ७० पिन्ट तुयुगु हि वितरण यानाच्वंगु ख्वप रेडक्रस रक्त सञ्चार केन्द्रं मेसिन स्यंगुलिं तत्काल कम्पोनियन याःगु हि उपलब्ध याके मफयाच्वंगु केन्द्रया कर्मचारीं धाःगु दु।
रेडक्रस सोसाइटी ख्वप शाखाया सभापति मनोजकुमार थापां येँया केन्द्रीय रक्तसञ्चार केन्द्रय् हयाः न्हिंन्हिं हि कम्पोनियन यानाः मागअनुसार हि वितरण यानाच्वंगुलिं छुं नं समस्या मदुगु दावी याःगु दु।
मेसिन मर्मत सुरु जूसां माःगु छता सामान भारतय् तकं मदुगुलिं जर्मनं हयेगु कुतः जुयाच्वंगु दु। उगु सामान थ्यनेवं मेसिन सञ्चालन जुइगु जानकारी नं वय्कलं बियादिल।