संविधानय् फुक्क आन्दोलनया नां दुथ्याकीगु
येँ (सन्ध्या टाइम्स)/न्हूगु संविधानया निंतिं विवाद जुयाच्वंगु विषय ज्यंकेत दयेकातःगु संविधानसभाया संवैधानिक समिति अन्तर्गतया उपसमितिया थौं च्वंगु मुँज्यां न्हूगु संविधानया प्रस्तावनाय् जनयुद्धनिसें फुक्क कथंया नां दुथ्याकेगु धकाः सहमति जूगु दु। आन्दोलनया विवरण व्याख्यात्मक टिप्पणीइ दुथ्याकेगु धकाः नेतातय् दथुइ सहमति जूगु दु। सिंहदरवारय् थौं सुथय् च्वंगु उपसमितिया बैठकय् अथे सहमति जूगु दु धकाः एमालेया नेता सुरेन्द्र पाण्डें संचारकर्मीतय्त जानकारी बियादीगु दु।
अथे हे संविधानय् संशोधनया प्रावधान संविधानय् हे तयेगु ला कि मतयेगु धकाः दलया नेतातय् दथुइ विवाद जुयाच्वंगु खःसा थौंया बैठकय् संशोधनया प्रस्ताव तयेगु धकाः नं सहमति जूगु दु ।
आः उपसमितिया बैठक कंस पुस ७ गते च्वनीगु जूगु दु। उपसमितिया संयोजक प्रचण्डं पुष १५ गतेया दुने राज्य पुनर्संरचनाया विषय बाहेक फुक्क विवादित विषययात कयाः सहमति जुइ धकाः विश्वास प्वंकादीगु दु। आः राज्य पुनर्संरचना बाहेक ११ गू जक विवादित बिषय ल्यंदनि ।
