गुदँ लिपा पृथ्वी ध्वस्त जुइ धकाः स्कूल वनेगु त्वःतल

येँ(सन्ध्या टाइम्स)/थनि गुदँ लिपा पृथ्वी हे ध्वस्त जुइगु जुल, आः छुकिया नितिं आखः ब्वनेगु धकाः सिन्धुपाल्चोकया दलित मस्तय्सं स्कूल वनेगु हे त्वःताहःगु दु। मस्तय्सं थुकथं स्कूल वनेगु त्वःतूगुलिं अभिभावकत व समाजसेवीत चिन्तित जूगु दु।
क्रिश्चियन धर्मालम्बीतय्सं सन् २०१२ पाखे पृथ्वी ध्वस्त जुइगु जुल धकाः धर्मया प्रचार याःगुलिं सिन्धुपाल्चोक जिल्लाया थीथी दलित वस्तीया मस्त अथे स्कूल वनेगु त्वःताहःगु खः।
धर्म प्रचार यायेगु झ्वलय् अन सक्रिय जुयाच्वंपिं क्रिश्चियनतय्सं दलित मस्तय्त भ्रम ब्वलंकाः निराश यायेगु नापं धर्मया प्रचार प्रसार यायेगु ज्याय् प्रयोग याःगुलिं जिल्लाया बाल कल्याण समिति व जिल्ला प्रहरी प्रशासनय् स्थानीय मनूतय्सं उजुरी तःगु दु।
दलित मस्त अज्याःगु भ्रमय् लानाः स्कूलय् हे वनेगु त्वःताहःगु खँय् चिउताः तसें अनया दलित समाज चौतारी व मस्तय् अभिभावकतय्सं उकथंया उजुरी दर्ता याःगु खँ बाल कल्याण समिति सिन्धुपाल्चोकया अधिकृत बालकृष्ण बस्नेतं जानकारी बियादीगु दु।
थ्वया हे दथुइ सिन्धुपाल्चोकया जिल्ला प्रशासन कार्यालयपाखें १८ दँ मथ्यंनिपिं मस्त न्ह्याम्ह जूसां इमित धर्मया प्रचारप्रसार याके मबीगु, जबर्जस्ती धर्म परिवर्तन याकीपिं मनूतय्त नियन्त्रणय् कायेगु निंतिं थःगु मातहतया फुक्क निकाययात परिपत्र जारी याये धुनागु दु धकाः प्रमुख जिल्ला अधिकारीं जानकारी
बियादीगु दु।