राजसंस्थाया निंतिं संघर्ष यायेत फेसबुक

फेसबुकपाखें हे धमाधम फाराम इनाच्वन

येँ (सन्ध्या टाइम्स)/अमेरिकाया राजदूत स्कट एच. डेलिसीं इन्टरनेटया सामाजिक संजाल 'फेसबुक' प्रयोग यानाः नेपाःया राजनीतिक दल व नेतातय्त दबाव बीगु कुटनीतिक भूमिका म्हिताः वयाच्वंगु इलय् आः वयाः राजावादीतय्सं नं 'फेसबुक' यात हे प्रयोग यानाहःगु दु।
राजसंस्थायात पुनर्स्थापनाया नितिं संघर्ष यायेत इमिसं उकथं 'फेसबुक'या प्रयोग यानाहःगु खः। संघीय लोकतान्त्रिक गणतन्त्रया विरोध यानाः हाकनं राजतन्त्र स्थापना यायेगु नितिं 'फेसबुक' मार्फत थौंकन्हय् फारम धमाधम इनाच्वंगु दु ।

राजसंस्था पुनर्स्थापना संघर्ष समिति धकाः नां तयाः 'फेसबुक' चायेकाः फाराम इनेगु ज्या यानाच्वंगु खः।
उगु फारामय् राजसंस्था पुनर्स्थापना संघर्ष समिति धकाः यलया थाय् तयातःगु दु। तर स्वापू तयेगु नम्बर व मेमेगु धाःसा छुं नं न्ह्यथनातःगु मदु। राजसंस्था हाकनं लित हयेगु नितिं जुइगु संघर्षय् सक्रिय जुइगु नापं उकिया विधानयात नालाः वनेगु धकाः व्यहोरा तयातःगु फारामय् सदस्य जूम्हेसिया किपा नं तयेगु व्यवस्था यानातःगु दु।
उगु संघर्ष समितिया लेटर प्याडय् ज्ञानेन्द्र शाहया किपा तयाः लोगो दयेकातःगु दुसा भाषाय् खय् भाय् व नेवाः भाय् धकाः च्वयातःगु दु ।

थ्व ल्याखं उगु 'फेसबुक' नेवाःतय्सं चायेकूगु खयेमाः धकाः अःपुक हे अनुमान यायेफइगु अवस्था दु। सदस्य जुइगु फारामय् सदस्य जुइम्हेसिया फोन नं. निसें थाय्बाय्, लजगाः नापं फुक्कं भरे यायेमाःगु अले नागरिकता नं माः धकाः न्ह्यथनातःगु दु। 'फेसबुक'य् राजतन्त्र पुनर्स्थापनाया नितिं संघर्ष यायेत धकाः फाराम इनेगु नापं 'फेसबुक' तकं चायेका ज्या यानाच्वंगु थ्व अवस्थाय् संघीय लोकतान्त्रिक गणतन्त्र नेपाःया प्रशासनं छु स्वायाच्वंगु खः धकाः मनूतय्सं न्ह्यसः तयाहइगु स्वाभाविक हे खः ।