कांग्रेसया बन्दं देय्न्यंकंया जनजीवन प्रभावित

स्वंगः गाडी तोडफोड यानाः च्याकाबिल

येँ (सन्ध्या टाइम्स)/प्रमुख प्रतिपक्ष नेपाली कांग्रेसं थौं नेपाल बन्द आह्वान याःगुलिं सुथंनिसें देय्न्यंकंया जनजीवन प्रभावित जूगु दु। बजाः, यातायात, कलकारखाना, शिक्षण संस्था फुक्कं ठप्प जूगु दु।कांग्रेसं शान्तिपूर्ण बन्द धकाः धाःसां कार्यकर्तात धाःसा आक्रामक रुपं प्रस्तुत जुयाः येँय् जक स्वंगः गाडी तोडफोड यानाः च्याका बी धुंकूगु दु। कांग्रेसया कार्यकर्तातय्सं चाबहि लागाय् लः ज्वनावःगु ट्यांकर, पर्यटकत ज्वना वःगु बस तकं तोडफोड यानाबिउगु दु। बन्द आह्वानकर्तातय्सं थौं सुथय् चाबहि लागाय् बा १ ज १६३ नम्बरया ट्याक्सी तोडफोड यानाः मि तयाः ध्वस्त यानाबिउगु दु। अथे हे तिलगंगा लागाय् प्राइभेट नम्बरया बा ९ च ३७२० नम्बरया कार तोडफोड यानाः च्याकाबिउगु दु। अथे हे पर्यटकत ज्वनावःगु बा १ य ८५० नम्बरया सवारी साधानयात नं अन तोडफोड यानाः मि तयाबिउगु दु । गाडीइ च्वनावःपिं पर्यटकतय्त क्वकयाः गाडिइ मि तयाबिउगु खः धकाः महानगरीय ट्राफिक प्रहरी महाशाखां धाःगु दु। चाबही लागाय् लःया ट्यांकर तोडफोड यानाबिउगु घटनाय् संलग्न जूगु आशंकाय् प्रहरीं स्वम्हेसित नियन्त्रणय् काःगु दु। अथे हे बन्द आह्वानकर्तातय्सं येँया प्रदर्शनी मार्ग लागाय् च्वंगु बाल्मीकि क्याम्पसय् परीक्षा जुयाच्वंगु इलय् हे क्याम्पसय् दुहां वनाः परीक्षा बन्द यानाबिउगु दु। चितवनया कारागारय् आक्रमणय् लानाः घाःपाः जुयाः मदुम्ह तरुण दल चितवनया अध्यक्ष शिव पौडेलयात सहिद घोषणा यायेमाःगु, वय्कः नापं ज्वंपिं मेमेपिं कार्यकर्तातय्गु मुद्धा खारेज यायेमाःगु लगायतया माग तयाः कांग्रेसं थौं बन्द आह्वान याःगु खः ।

मां मदुगुलिं कांग्रेसया नेता पौडेल हेलिकप्टरं वन
नेपाली कांग्रेसया नेता नापं संसदीय दलया नेता रामचन्द्र पौडेलया मां ऋषिमाया पौडेल थौं मंत। ९१ दँया थः मां थःगु हे निवास चितवनय् मदुगुलिं नेता पौडेल येँनं हेलिकप्टरय् च्वनाः चितवनपाखे झायादीगु दु। कांग्रेसं हे नेपाल बन्द आह्वान यानातःगुलिं यातायात ठप्प जूगु अवस्थाय् नेता पौडेल हेलिकप्टरं उखेपाखे झाःगु खः। मदुम्ह पौडेलया न्याम्ह काय व स्वम्ह म्ह्याय् दु। रामचन्द्र पौडेल ऋषिमायाया तःधिकःम्ह काय खः ।