डेलिसीयात देशं पितिने माःगु कांग्रेसया माग
येँ (सन्ध्या टाइम्स)/नेपाली कांग्रेसं थौं बन्द आह्वान याःगु विषययात कयाः अमेरिकी राजदूत स्कट एच. डेलिसीं थःगु 'फेसबुक'य् लोकतान्त्रिक पार्टी कांग्रेसयात मल्वःगु सिद्धान्तया अःखः ज्या धकाः टिप्पणी यानादीगु दुसा उकियात कयाः कांग्रेस डेलिसी विरुद्ध प्रस्तुत जूगु दु। नेपाली कांग्रेस केन्द्रीय समितिया नामं चायेकातःगु फेसबुकय् डेलिसीया तसकं विरोध यानातःगु दु ।
कांग्रेस केन्द्रीय समितिया फेसबुकया स्टाटसय् ला डेलिसियात नेपालं पितिनेमाः धकाः तकं च्वयातःगु दु। अमेरिकी विस्तारवादी नीति खारेज यायेमाःगु नापं नेपाःया आन्तरिक मामिलाय् न्ह्यःने लाःथे न्ववात धकाःडेलिसीयात खबरदारी तकं यानातःगु दु ।
फेसबुकया स्टाटसय् च्वयातःगु दु 'खबरदार अमेरिकी राजदूत डेलिसी।।। नेपाःया आन्तरिक विषययात कयाः हस्तक्षेप यायेगु बन्द या। अमेरिकी विस्तारवादी नीति खारेज या व अमेरिकी राजदूतयात थःगु कुटनीतिक मर्यादाय् च्वनेत चुनौति बियाच्वना। कुटनीतिक मर्यादा उल्लंघन यानाः न्ह्यःने लाःथे अभिव्यक्ति बीम्ह राजदूतयात देशं पितिनेमाः ।'
कांग्रेस थुकथं फेसबुकया माध्यमं राजदूत डेलिसी विरुद्ध आक्रामक रुपं प्रस्तुत जूगु धइगु गनं कांग्रेस व डेलिसीया दथुइ स्वापू स्यंगुया संकेत जकं मखुला धकाः आशंका यानाहःगु दु ।
