किपा च्वज्या व न्वचु धेंधेंबल्लाः कासा

येँ (सन्ध्या टाइम्स)/कन्सर्न नेपालं नीनिक्वःगु अर्न्तराष्ट्रिय बाल अधिकार दिवस व न्हूदँ ११३२ या लसताय् मचा किपा च्वज्या व न्वचु धेँधेँबल्लाः कासा वंगु शनिवाः थनया बसन्तपुली जुल। ने.सं. ११३२ राष्ट्रिय समारोह समितिया नायः भाजु पद्मरत्न तुलाधरया सभापतित्वय् जूगु उगु समारोहय् मूपाहां महिला बालबालिका तथा समाज कल्याण मन्त्रालयया सचिव भाजु आनन्दराज पोखरेलं उलेज्या यानादिल। संयुक्त राष्ट्र संघं सन् १९८९य् बाल अधिकार सम्बन्धि महासन्धि पारित याःगु लुमंतिइ दँय्दसं थज्याःगु ज्याझ्वः कन्सर्नं न्हयाका वयाच्वंगु दु। थुयुसी थ्व ज्याझ्वःया मूखँ यचुपिचु यायेनु, मचा अधिकार कायेनु' तयातःगु खः। कन्सर्नया नायः भाजु बिजय सैजुं लसकुस यानादीगु उगु ज्याझ्वलय् सांसद बुद्ध साय्मिं कन्सर्नं याना वयाच्वंगु थुगु ज्यां यक्व मस्तय्त थःगु माभाषां खँ ल्हायेत हःपाः बियाच्वंगु खँ कनादिल ।

किपा च्वःज्या धेंधेंबल्लाय् मुक्कं १६५ म्ह मस्तय्सं ब्वति काःगु खः। निगू पुचलय् ब्वथलाः जूगु उगु ज्याझ्वलय् १४ निसे १६ दँ पुचलय् संजय तामाङ्ग, सुस्मिता लामा व निर्जल तामाङ्गं छसिंकथं न्हाप, लिउ, लियांलिउ सिरपाः त्याकूगु खःसा कर्ण गुरुङ्गं हःपा सिरपाः त्याकूगु खः। अथे हे १३ दं क्वय्यापि मस्तय्गु पुचलय् आकाश कर्माचार्य, सत्यराज जोशी, व मनिस ध्वजुं छसिंकथं न्हाप, लिउ, लियांलिउ व सुस्मिता श्रेष्ठं हःपाः सिरपाः त्याकूगु खः।
अथे न्वचु धेँधेँबल्लाखय् रसु नकर्मी, निभाः शाक्य, व रोहिणी शाक्य छसिकथं न्हाप, लिउ, लियांलिउ व सुरुची श्रेष्ठं हःपाः सिरपाः त्याकूगु ख ।