आदिवासी फिल्मया व्यावसायीकरण

नेवाःत जनजाति धलखय् नं न्ह्यलुवाः खः धइगु खँ जनजाति चलचित्र दयेकेगु ज्याय् दकलय् न्हापां नेवाःतय्सं हे यानाक्यंगु सफलतां नं सीदु । २०४४ सालय् न्हापांखुसी नेवाः फिल्म 'सिलु' तयार जुल । वयां लिपा तिनि धमाधम थारु, गुरुङ, तामाङ,‍‍‍ नापं थीथी जनजातितय् फिल्म तयार जुइगु शुरु जुल । आः तक नेवाःतय् फिल्म न्यय्गू थ्यंगु दुसा च्यादँ झिदँ लिपा जक फिल्म दयेकेगु शुरु याःगु तामाङ, व गुरुङतय्सं नेपालभाषाया फिल्म दयेकेगु ल्याःयात हाचां गायाः व स्वयां नं झिगू झिंन्यागू ति अप्वः दयेकेधुंकूगु दु । अथे खःसां नेपालभाषाया फिल्म 'सिलु', 'राजमति' लगायत न्हून्हूगु फिल्मं दयेकूगु इतिहासयात धाःसा मेमेगु जनजाति फिल्मं ध्वये मफुनि । छाय्धाःसा 'राजमितं' सार्वजनिक प्रदर्शनीया न्यय्छन्हु पार यानाः रेकर्ड समेत खःसा 'सिलु' ला नेपालभाषाया जक मखु सम्पूर्ण जनजातितय्गु हे न्हापांगु फिल्म जुयाः हलय् पिलू वःगु खः ।

थथे जनजातितय्गु फिल्म दयेकेगु चलन शुरु जूगु नीदँ लिपा नगुने २०६४ सालय् न्हापांखुसी आदिवासी जनजाति चलचित्र महोत्सव जुल । थुगुसी स्वक्वःगु नेपाल आदिवासी चलचित्र महोत्सव आः नकतिनि क्वचाःगु दु । जनजाति चलचित्र महोत्सव जूगु स्वक्वःगु तक थ्यंगु इलय् जनजातितय्गु चलचित्रया संख्यात्मक व गुणात्मक निगुलिं अभिबृद्धि जूगु खनेदु । आः वयाः येँया सिनेमा हलय् छक्वलं हे खुगू न्हय्गू हलय् जनजातितय् चलचित्र क्यने फइगु तकया क्षमता नं विकास जुइधुंकूगु दु । तर उगु चलचित्रया ब्यावसायीकरणय् ध्यान मतःगु कारणं गुलि आम्दानी याये फइगु खः उलि धाःसा याये फयाच्वंगु मदुनि । गुलिं लेखक निर्देशकतय्सं ब्यावसायीकरण यायेमाः धइगु चाहना तकं मतःगु कारणं नं अथे जूगु खः । जनजातिया फिल्म निर्माण अझ नं 'मिशन' जुयाः न्ह्याः वनाच्वंगु दनि । न्हापा गथे हलय् फिल्म तयाः छुं टिकटया भरय् लगानी म्हयेत स्वइगु खः आः नं उकथं हे परम्परागत लू ज्वनाः लगानी उठे यायेगु बाहेक मेगु छुं नं न्हूगु लूपु मालेगु मस्वःगु कारणं नं जनजाति फिल्म ब्यावसायीकरणपाखे वने मफयाच्वंगु खः । थज्याःगु परम्परागत बजारं आः फिल्म क्षेत्र म्वाये मफइगु स्थिति मदु । अज्याःगु खँयात ध्यानय् तयाः हे आः नकतिनि गुंगू जातीय चलचित्र संघत जानाः आदिवासी जनजाति चलचित्र महासंघ नीस्वंगु दु । नविन सुब्बां उकिया नेतृत्व यानाच्वंगु दु ।

राज्यपाखें हे थज्याःगु थीथी कथंया जातीय चलचित्र दयेकेगु ज्याय् ग्वाहालि यानाः उमिगु उत्थान व प्रगति यायेगु स्वत धाःसा याकनं जनजातिया चलचित्र निर्माण व बजार ब्यवस्थापन जुइ फइगु खइ । तर गुलिं सार्वजनिक रुपं प्रदर्शन यायेधुंकूगु संकिपातय्सं नं समस्या धाःसा भोगे हे यानाच्वंगु दु । जनजातितय्के ध्यबा दु तर थःगु जातिया फिल्म निर्माणय् लगानी यायेत धाःसा तयार मदु । अझ स्वनिगलं पिने दयेकीगु म्हो लगानीया चलचित्रत दर्ता यायेत येँय् हे वयेमाःगु थेंज्याःगु खर्चालु कारणं नं जनजातितय् चलचित्रया विकास जुइ मफुगु खः । मेमेगु नेपाली ब्यावसायिक चलचित्र सरह हे उकियात कर काइगु सरकारी नीतिया कारणं नं थज्याःगु फिल्म दयेकीपिं उत्साहित जुइ मफयाच्वंगु खः । आः अज्याःगु नियम हिलेगु ज्याय् नेपाल चलचित्र बोर्ड लगे जुयाच्वंगु दु । न्हूगु विधेयकय् अज्याःगु फुक्कं समस्या चीकेगु कुतः जुयाच्वंगु दु । तर थ्व विधेयक तयार जुइधुंकूसां मन्त्रिमण्डलं ध्याकुनय् लाकातःगु दु । आः नं जनजाति चलचित्र दयेकीपिं दथुइ हे थःपिनि फिल्म हलय् क्यने फइ मखु धइगु मानसिकता दु । तर 'सिलु' व 'राजमति' क्यंगु इलय् भीड नियन्त्रणया लागिं पुलिसयात तकं थाकुगु खूयात लुमंकेगु खःसा आः नं यदि कुतः यात धाःसा जनजाति फिल्मं बजाः दयेके फइ तिनि धइगु खँयात अझ नं पत्याः यायेथाय् दनि ।

More Stories Like this