कांग्रेसया बन्द व अन्तर्राष्ट्रिय ख्यः

थःत दकलय् लोकतन्त्रवादी व प्रजातन्त्रवादी धकाः दावी यानाः वयाच्वंगु नेपाली कांग्रेसं थौं नेपाल बन्द यानाः जनजीवनय् लिच्वः लाकाबिउगु दु। जेलय् कुनातःम्ह कांग्रेस भातृ संगठन तरुण दल चितवन जिल्लाया अध्यक्ष शिव पौडेल सीगु घटनाया विरोधय् कांग्रेसं थौंया बन्द आव्हान याःगु खः ।

कांग्रेसं आह्वान याःगु बन्द ज्याझ्वः लित कायेत प्यखेरं इनाप याःगु खः। कुटनीतिक नियोगंनिसें अमेरिकीया राजदूत स्कट एच. डेलिसीं तकं बन्द लितकायेत इनाप याःगु खः। नेपाःमि जनताया स्वतन्त्रतापूर्वक वये वने दइगु, भय व त्रास विनाः जीवनयापन याये दइगु लोकतान्त्रिक व प्रजातान्त्रीक मान्यता नालाः वयाच्वंगु कांग्रेसं थःगु सिद्धान्तया अःखः बन्द ज्याझ्वः मयायेत प्यखेरं इनाप याःगु खःसां अन्ततः कांग्रेसं थौं बन्द यायेगु हे निर्णय यात ।

कांग्रेसया थौंया बन्द आह्वानं यानाः अमेरिकी राजदूत डेलिसीं ला आः नेपाः सुरक्षित गन्तब्य तकं मजुइफु धकाः थःगु बिचाः 'फेसबुक' मार्फत प्वंकल। वय्कलं कांग्रेस थेंजाःगु पार्टी हे ध्वंसात्मक ज्याय् वंगुलिं नेपाः सुरक्षित गन्तव्य मजुइफु धकाः गुगु ख्याच्वः बियादिल व धइगु कांग्रेसया नितिं जक मखु नेपाः व नेपाःपिनिगु निंतिं हे बांमलाःगु खँ खः ।

उलि जक मखु युरोपेली संघय् आबद्ध जुयाच्वंगु राष्ट्रतय्सं तकं बन्द ज्याझ्वः लितमकाःगुलिं थःपिनिगु मुलुकय् नेपाली नागरिकयात प्रवेश आज्ञा तकं मबीगु ख्याच्वः बी धुंकूगु दु। उज्वःगु कथं अन्तर्राष्ट्रिय ख्यलं ख्याच्वः वये धुंकूगु अवस्थाय् नं कांग्रेसं बन्द ज्याझ्वःयात लित मकाःगुलिं यानाः बन्द आह्वान याःगु दलयात जक मखु स्वयं नेपाःमि व नेपाःयात तकं बांमलाःगु लिच्वः लायेफुगु संभावना अप्वयावःगु दु ।

More Stories Like this