दकलय् कमजोर सरकार

- तारण शाक्य

प्रधानमन्त्री माधव नेपालया न्हापांगु रणनीति देय् व जनता प्रति लक्षित मजुसे माओवादी प्रति लक्षित खनेदत । सरकार त्याग यानावंपिं माओवादीतय्त माधव नेपालया सरकारय् सहभागी जुयाः सहकार्य याना बिउ धकाः एमालें अनुनय विनय यायेमाःगुया अर्थ छु ? माओवादीं बाध्यतावस प्रधानमन्त्रीं राजीनामा यानाः थःगु इज्जत गौरवया प्रतिष्ठा ल्यंकल धाःसा उचित हे जुइ । एमाले थेंज्याःम्ह वामपन्थी किजां सहकार्यय् धोका बीकाः सरकारय् च्वनेगु उचित मताल । अथे जुयाः प्रधानसेनापति व राष्ट्रपतियात दोष बियाः सरकारं पिहां वल । व घटनाया मू हुनि धयागु एमाले दथुइ हे असहमति क्यनाः सहकार्यं लिचिउगुिलं खः धकाः स्पष्ट कथं माओवादीं धयाच्वंगु हे दु । अथे धाःसां नं राष्ट्रपति व सेनापतिया विरुद्ध संसद अवरुद्ध यानाच्वंगु इलय् माधव नेपालयात प्रधानमन्त्री घोषणा याकेत संसदया ज्या न्ह्याके हे बिल । संसद अवरुद्ध यानागु कारणयात असंवैधानिक धाधां थाति तयाः छपलाः लिचिलाः राजनैतिक चरित्रयात आत्मसात याना हे क्यन । थथे क्रान्तिकारी वामपन्थी जुयाः नं उकियात चरितार्थ याःगुयात मूल्य बी हे माः । प्रधानमन्त्री थेंज्याःगु पदं राजीनामा बीमाःगु विवशता धयागु अत्यन्त मार्मिक विषय खः । दकलय् तःधंगु पार्टी जुयाः नं सरकार थः यःयःथे न्ह्याके मफुगु मेगु विवशता खः । प्रजातन्त्रवादी धाईपं नेतातय्गु हाबी जुयाच्वंगु देयया राजनीतिइ वाम राजनैतिक प्रदर्शन यायेगु ई मजूनि धयागु तथ्ययात प्रचण्डया सरकारं प्रस्ट याना बिउगु दु । थथे राजनीतिया मूल्यांकन यायेगु इलय् प्रचण्ड सरकारया कार्यकालयात प्रशय बीमाःगु खनेदत

देय्या राजनीतिइ कांगे्रस नेतातय्गु एकतन्त्रीय रणनीति प्रशय कयाच्वंगुयात चुनौति बीगु अःपुगु विषय मखु । वाम पार्टीतय्सं उकियात उपचार याये मफयेकं न्ह्याथेंजाःगु रणनीति नं देय्यात उखेथुखे याये मफइगु सिद्ध जुयाच्वंगु दु । माओवादीतय्सं संसद व सतक न्ह्याक्व अवरुद्ध याःसां नं थःपिं हे बदनाम जुइगु सिवाय माग पूवनी मखु धकाः संसद अवरुद्ध व सतक आन्दोलनं क्यने हे धुंकल । थथे समस्त नेपाःया नेतातय्त न्ह्यपु सिलाः प्रजातन्त्र स्वथना तयेधुंकूगु जुयाः प्रजातन्त्रया रोगं देय् व जनता क्यान्सर जूसां नं प्रजातन्त्रया अवशेष म्हंकाः लोकतन्त्र स्थापना याये फइगु अवस्था मदु । ४६ सालया प्रजातन्त्र न्हंसां नं ६३ सालया जनवादी लोकतन्त्रयात पुलांगु हे प्रजातन्त्रय् लित यंकेगु कांगे्रस नीति सफल जुजुं वःगु खने दयावःगु दु । एमालेया माधव नेपालयात प्रधानमन्त्री प्रस्ताव व उकिया सफलतां अवश्य राजनीतिक क्षेत्रय् छुं खँ प्रस्ट याः । लोकंमह्वाःम्ह माधव नेपालयात हे लोकतन्त्रया प्रधानमन्त्री छाय् याये माःगु दोष एमालेयागु जक मखु मौकाय् चौका ह्वायेगु अवसर सुनां त्वःती तर व अवसरया श्रृष्टिकर्ता ला गिरिजाप्रसादं बिउगु खः नि । अथे जूगुलिं विदेशीतय्त अपजस बीमाःगु मदु । देय्या नेतात हे अपहरण याना तसेंलि उमित अपहरणं मुक्त यायेफत धाःसा देय्या राजनीतिं अग्रगति काइगु स्वतः सिद्ध जू ।

माधव नेपाल प्रधानमन्त्री यायेत कांग्रेसयात नं अःपु मजुल । कांगे्रस एमालेया सांठगांठय् साम दाम दण्ड भेद नीति नालाः तिनि मुश्किलं बहुमत खाके फत । थथे कमजोर अवस्थाय् दयेकूगु सरकारय् नं मन्त्रिमण्डलया इनेज्या ताः लानाः संकटय् लानाच्वंगु दु । मधेशी जनअधिकार फोरमयात जीवन मरणया दोधारे लाकाः तिनि माधव नेपाल प्रधानमन्त्री जुइ खन धाःसा उकिया बदला कायेत आः हे नं मन्त्री इनेगु ज्याय् फोरमय् ल्वापु जुइधुंकल । विजयकुमार गच्छेदारं धाःगु मन्त्री पद मबिल धाःसा थ्व सरकारया दिन गन्ति शुरु याःसां जिल । थपाय्सकं बमलाःम्ह माधव नेपालं थःगु सरकारय् दुहां वा धकाः माओवादीयात सःतेगु मल्वः । प्रधानमन्त्रीया देय्या नामय् वःगु संवोधनय् माओवादीया निंतिं प्रतिष्ठाया विषय जुयाच्वंगु राष्ट्रपति विरुद्धया संकल्प प्रस्तावयात परवाह मयासे सेनापति व राष्ट्रपति निम्हेसितं धन्यवाद बियाः माओवादी - हीमी चायेका बिउगु दु । व अवहेलना माओवादीतय्सं पचे याये फइ ला अथे जूगुलिं एमालें हे पत्याः मयाःम्ह अलोकतान्त्रिक कथं अपहरण यानाहःम्ह माधव नेपाल प्रधानमन्त्रीयात जुइगु शौभाग्य चूलात धकाः इतिमिति कंक न्यासि चायेगु थाय् मदु । माओवादीं मुंका थकूगु धुकुती राज याये खन थ्व हे जक तःधंगु शौभाग्य सिबाय् मेगु अप्वः आशा यायेगु मतिइ मतःसां जिउ । देशय् शान्ति सुव्यवस्था व संविधान निर्माण यायेगु खँ माधव सरकारं पूवंके फइ मखु । थ्व निश्चित खः । भाषणं जक जनताया मन साले मफइगु आःया इलय् ज्या हे यानाः क्यनेमाः । गथे प्रचण्डकालय् अर्थ मन्त्री डा। बाबुराम भट्टराईनं अर्थ संकलन यायेगुली सफलता क्यनावंगु खः अथे हे खँया सिबें ज्या यानाक्यने फत धाःसा कुंखिने थाय् दइ मखु । अन्यथा माधव नेपालया बहुमतीय सरकार आलोचनां मुक्त जुइ फइ मखु ।

More Stories Like this