थौं कांग्रेसं मसाल जुलुस पिकाइगु
येँ (सन्ध्या टाइम्स)/नेपाली कांग्रेसं थौं सनिलय् येँय् नापं देय्न्यंकं मसाल जुलुस पिकाइगु जूगु दु। कारागारय् हे आक्रमण यानाः घाःपाः जूम्ह तरुण दल चितवनया अध्यक्ष शिव पौडेल सीगु घटनाया विरोधय् मसाल जुलुस पिकायेगु तयारी याःगु खः ।
उगु घटनाया विरोधय् कन्हय् शान्तिपूर्ण नेपाल बन्द यायेगु धकाः घोषणा याःगु कांग्रेसयात प्यखेरं दबाव वःगुलिं थौं सुथय् पार्टीया सभापति सुशील कोइरालाया निवास महाराजगञ्जय् च्वंगु केन्द्रीय पदाधिकारीया बैठकय् विरोधया कार्यक्रमया बारे सहलह ब्याकूगु खः। उगु सहलह ज्याझ्वःलिपा कांग्रेसया नेतातय्सं प्रधानमन्त्री डा. बाबुराम भट्टराईलिसे सहलह ब्याकेगु नापं माग पूरा मजूतले आन्दोलनया ज्याझ्वः यथावत तयेगु धकाः खँ जूगु खः। प्रधानमन्त्रीलिसे सहलह लिपा जक थःपिनिगु रणनीति तयार यायेगु जुइ धकाः नेतातय्सं जानकारी बियादीगु दु ।
कांग्रेसं मदुम्ह पौडेलयात सहिद घोषणा यायेमाःगु, वय्कः नापं ज्वनाः कुनातःपिं मेमेपिनिगु मुद्दा लित कायेमाःगु, गृहमन्त्रीं राजीनामा बीमाःगु माग याःगु दु ।
थ्वया हे दथुइ कांग्रेसया माग कथं सरकारं म्हिगः हे प्यम्हेसिया उच्चस्तरीय न्यायिक आयोग गठन यायेगु नापं मदुम्हेसिया छेँजःयात १० लाख तका क्षतिपूर्ति बीगु धकाः निर्णय याये धुंकूगु दु ।
थ्वया हे दथुइ उगु घटनायात कयाः आधिकारीक धारणा सार्वजनिक यायेगु नितिं थौं हे सनिलया स्वता इलय् पार्टीया सभापति कोइरालाया निवासय् पत्रकार सम्मेलन याइगु जूगु दु। अथे हे मदुम्ह पौडेलया शवयात्रा चितवनय् यानाः थौं हे अन्तिम संस्कार याइगु जूगु दु ।
नेतातय्गु निर्देशनयात अवज्ञा यानाः थाय् थासय् बन्द
कांग्रेसया नेतातय्सं सर्वसाधारणया जनजीवनय् लिच्वः लाइकथं बन्द व प्रदर्शन मयायेत निर्देशन बिउगु यात अवज्ञा यानाः कार्यकर्तातय्सं थौं चितवन, झापा व भोजपुर बन्द याःगु दुसा येँया थाय् थासय् प्रदर्शन याःगु दु ।
झापा व भोजपुरय् तरुण दल व नेविसंघया कार्यकर्तातय्सं सुथंनिसें प्रदर्शन यानाः बजाः, यातायात नापं शैक्षिक संस्था बन्द याकूगु दु। झापाया तरुण दलया अध्यक्ष नरेन्द्रकुमार खड्कां अनिश्चितकालीन बन्द यानागु खः धकाः संचारकर्मीतय्त धाःगु दु। उखे तरुण दल व नेविसंघया कार्यकर्तातय्सं भोजपुरय् सुथंनिसें हे सतकय् कुहां वयाः बन्द यानाच्वंगु दु। बन्दं यानाः जनजीवन प्रभावित जूगु दु। थ्व हे झ्वलय् नेपाली कांग्रेसया चितवन जिल्ला सचिव देवेन्द्र गुरुङं थौं छुं नं कथंया बन्द ज्याझ्वः मदु धकाः धयादीसां कार्यकर्तातय्सं धाःसा बन्द यानाच्वंगु खँ वय्कलं स्वीकार यानादिल। अथे हे कांग्रेसया भातृ संगठन नेपाल विद्यार्थी संघया कार्यकर्तातय्सं नं पार्टीया निर्देशनया अवज्ञा यानाः थौं सुथंनिसें येँया थीथी कलेजया न्ह्यःने प्रदर्शन याःगुलिं यातायात संचालनय् पंगः ब्वलंगु दु। नेविसंघया कार्यकर्तातय्सं त्रिचन्द्र कजेल, पशुपति क्याम्पस व ताहाचल क्याम्पस लागाय् थुकथंया प्रदर्शन यानाः सवारी जाम याःगु खः ।
