न्याम्ह शीर्ष नेतातपाखें एमाले एकताबद्ध यायेगु घोषणा

येँ (सन्ध्या टाइम्स)/एमालेया न्याम्ह शीर्ष नेतातय्सं पार्टीयाट एकताबद्ध यायेगु घोषणा यानादीगु दु। एमाले उपत्यका विशेष समन्वय समितिं थौं येँय् याःगु अन्तर्त्रिया ज्याझ्वलय् न्ववासें पार्टीया अध्यक्ष झलनाथ खनाल, बरिष्ठ नेता माधवकुमार नेपाल, केपी शर्मा ओली, उपाध्यक्ष बामदेव गौतम व महासचिव ईश्वर पोखरेलं थुकिया घोषणा यानादीगु खः। ज्याझ्वलय् एमालेया अध्यक्ष खनालं पार्टीयात केन्द्रंनिसें क्वय्या तह तक एकतावद्ध यायेगु अभियान न्ह्याकेत कार्यकर्तातय्त निर्देशन बियादिल। वय्कलं धयादिल 'शीर्ष तहतक पार्टीयात एकतावद्ध यायेगु अभियान न्ह्याकाच्वनागु दु। छिकपिं नं न्ह्यचिलादिसँ ।'

नेता ओलीं विगतय् जूगु कमजोरीयात समीक्षा यानाः छप्पँ जुयाः वनेमाः धकाः बः बियादिल। अथे हे वरिष्ठ नेता नेपाल व महासचिव पोखरेलं नं एकता अभियानय् थःपिनिगु समर्थन दइ धकाः धयादिल। थ्व हे दथुइ थौं च्वनेगु धयातःगु स्थायी समितिया बैठक धाःसा स्थगित याःगु दु। नेतात व्यस्त जूगुलिं धकाः वइगु पुष ८ गते जक स्थायी समितिया बैठक च्वनीगु जूगु दु ।

केपी ओली भारतया न्हूदिल्लीपाखे
एमालेया प्रभावशाली नेता केपी शर्मा ओली थौं न्हूदिल्लीइ झाःगु दु। स्वास्थ्य उपचारया नितिं धाःसां वय्कलं भारतय् थीथी राजनीतिक दलया नेतातय्त नं नापलानाः नेपाःया राजनीतिया बारे सहलह ब्याकीगु जूगु दु। प्रधानमन्त्रीया दावेदारया रुपय् चर्चाय् वयाच्वंम्ह ओली भारत भ्रमणय् वनेत्यंगुयात मनूतय्सं अर्थपूर्ण रुपं कयाहःगु दु ।