राजनीतिक नियुक्ति राष्ट्रपतिपाखें यायेगु सहमति
येँ (सन्ध्या टाइम्स)/संविधानसभाया संवैधानिक समिति अन्तर्गत उपसमितिया थौं च्वंगु बैठकं राजदूत नापं विशेष प्रतिनिधि मन्त्रिपरिषद्या सिफारिसय् राष्ट्रपतिं नियुक्ति यायेगु सहमति जूगु दु। उगु बैठकय् संविधान संशोधन राज्य पुनर्संरचना नाप स्वापू दुगुलिं विवादित धलखं चीकेगु सहमति याःगु दु ।
थौं सुथय् च्वंगु उगु उपसमितिया बैठकं निगू विषययात कयाः सहमति जूगुलिं आः राज्य पुनर्संरचना बाहेक झिंप्यंगू बुँदाय् जक विवाद ल्यंदनि। सिंहदरवारय् थौं सुथय् बैठक लिपा उपसमितिया संयोजक प्रचण्डं संचारकर्मीतलिसे खँ ल्हासें संविधान निर्माणया नितिं ई तसकं म्हो जक ल्यं दनिगु जुयाः आः यक्व बहस मयासे 'गिभ एण्ड टेक'या अवस्थां जूसां याकनं सहमति यायेमाःगु मखुसा कार्यतालिका तकं हिलेमालीगु अवस्था वइ धकाः धयादीगु दु ।
थ्व हे दथुइ संवैधानिक समितिया बैठक कन्हय् च्वनीगु नापं लिपांगु इलय् उपसमितिइ सहमति जूगु विषययात न्ह्यब्वयेगु जुइ धकाः नं धाःगु दु ।
