अखिलेश मिश्रं नेवाः साहित्यकारपिं लुमंकल
येँ (सन्ध्या टाइम्स)/नेपालय् थःगु सरकारी ज्याया झ्वलय् झाःम्ह भारतीय विदेश मन्त्रालयया नेपाः डेस्क स्वइम्ह प्रमुख भाजु अखिलेश मिश्रं 'लिजः' नेपालभाषा कविता दबूलिसे खँल्हाबल्हा यासें नेपालभाषा साहित्य च्वन्ह्याकेगु ज्याय् थम्हं फुगु कुतः यायेगु खँ कनादिल ।
भाजु मिश्र नेपाःया निंतिं भारतीय राजदूतावासया सांस्कृतिक सहचारी जुयाः नेपाः च्वनादीगु इलय् लिजःलिसे जानाः तःगूमछि साहित्यिक ज्याझ्वः याःगु खः। नेपालय् थःगु कार्यकाल सिधयेकाः भारतया विदेश मन्त्रालय वय्कः नेपाः स्वयेगु डेस्कया प्रमुख जुयादीगु खः।
स्वयम् थः नं छम्ह साहित्यकार हे जुयादीम्ह वय्कलं न्हापा थःगु कार्यकालय् जूगु थीथी ज्याझ्वलय् थम्हं नापलाःपिं नेपालभाषाया कविपिं दुर्गालाल श्रेष्ठ, पूर्ण वैद्य आदिपिंत नं लुमंकादीगु खँ लिजःया नायः नवीन चित्रकारं कनादिल ।
वंगु वालय् नेपाः झाःम्ह भाजु मिश्रं नेपाःया शान्ति प्रक्रिया व संविधान च्वज्या सम्बन्धी ज्याखँय् जुयाच्वंगु प्रगति बारे संविधानसभाया अध्यक्ष सुभाष नेम्बाङ नापं थीथी पार्टीया नेतातय्त नं नापलानाः बिचाः कालबिल यानादीगु खः ।
