जेल दुने नं अपराध जूगुया लिच्वः

चितवनया जेलय् कुनातःम्ह नेपाल तरुण दल चितवन जिल्लाया अध्यक्ष शिव पौडेल सीगु घटनायात कयाः नेपाली कांग्रेस व वया भातृ संगठनत जानाः देय्न्यंकं तोडफोड सुरु याःगु दु। थुकिं यानाः हानं छक्वः देशय् आः छु तःधंगु अराजकता ब्वलनीगु खः थें धइगु ग्याःचिकु ब्वलंगु दु। मनू सीगु घटना सामान्य मखुसां थुकियात सर्वसाधारणं धाःसा थीथी दृष्टिकोणं स्वयाच्वंगु दु। दकलय् न्हापां ला थ्व कारागार दुने जूगु घटना जुल। तरुण दल थेंज्याःगु छगू राजनीतिक निकायया मनू अपराध सम्बन्धी मुद्दाय् लानाः जेल सजाय भोगे यानाच्वंगु दु। उकिं वय्कःयात गुलि विशुद्ध व्यक्तित्व माने याये फइगु खः, व छगू न्ह्यसः दनि। लिपांगु छुं ई न्ह्यवंनिसें राजनीतिक पार्टीतय्सं चायेकातःगु युवा भातृ संगठनया कार्यकर्तातय्सं थीथी कथंया आपराधिक ज्याखँय् समेत ल्हाः तया हःगु घटनात अप्वयाच्वंगु दु। माओवादीया वाईसीएल धा वा एमालेया युवा संघ धा अथवा नेपाली कांग्रेसया तरुण दल, थुकिया कार्यकर्तात अनेक कथंया आपराधिक ज्याय् संलग्न जुयाच्वंगु घटनात धमाधम सार्वजनिक जुयाच्वंगु दु। थज्याःगु अवस्थाय् उज्वःगु हे प्रकृति दुगु गुगुं छगू निकायया सुं छम्ह दुजः उकथंया हे अराजनीतिक घटनाय् लानाः सीवं उकियात राजनीतिक रंग बीगु खःसा थ्व ला अपराधयात तप्यंक हे राजनीतीकरण यायेगु ज्या जुइ। अपराध व राजनीतियात छथासं तल धकाः विरोध यानाच्वंगु कांग्रेस थेंज्याःगु पार्टी नं उकी लगे जुइगु खःसा आः कांग्रेसं थःत लोकतान्त्रिक पार्टी धकाः हानं दावी यायेगु छु औचित्य दनि? जेल दुने कुनातःम्ह मनूूयात दायाः स्यायेगु निसन्देह देय्या शान्ति सुरक्षाय् वःगु तःधंगु कमजोरी खः। तर उकिया दोष सरकार याकःचित जक बियाः मगां। फुक्क हे राजनीतिक पार्टीत थुकिया जिम्मेवार खः। फुक्कस्यां समान रुपं थुकिया जिम्मा कायेमाः। आः घटना उकियात छगू लिच्वः जक खः। नेपाली कांग्रेसं थ्वपाखें थःत अलग्ग तये फत धाःसा कन्हय् मेपिंसं अज्याःगु ज्या याःगु अवस्थाय् पतिं ल्ह्वनाः खबरदारी यायेगु हक कांग्रेसयाके सुरक्षित ल्यनाच्वनी ।

More Stories Like this