यूकेया पासा पुचः गुथियात शंखधर सिरपा

शंखधर सिरपाः समितिं थुगुसीया सिरपाः पासा पुचः गुथि यूकेयात बिइगु घोषणा याःगु दु । नेपाल संवत्‌यात यूरोपय् प्रचार प्रसार यायेगु ज्याय् योगदान याःगुलिं उगु संस्थायात थुगुसीया सिरपाः बीगु निर्णय याःगु खः।

सन् २००० य् पलिस्था जूगु पासा पुचः गुथि यूकें थःगु स्थापना कालंनिसें लण्डनय् नेपाल संवत् न्हूदँ हनेगु, 'गुथि' नांया पत्रिका पिकायेगु लिसें नेवाः भाय्, जाति व संस्कृतिलिसे स्वापू दुगु थीथी ज्याझ्वः याना वयाच्वंगु दु । वंगु अक्टोवरय् तिनि थुगु संस्थां वर्ल्ड नेवाः अर्गनाइजेशनलिसे जानाः लण्डनय् न्हापांगु हलिं नेवाः तःमुँज्या ग्वसाः ग्वःगु खः ।

थ्वहे वइगु पोहेलाथ्व खष्ठी कुन्हु नगदेशय् छगू ज्याझ्वः यासें संस्कृतिविद् सत्यमोहन जोशीं उगु सिरपाः लःल्हानादीगु खँ ग्वसाःखलकं धाःगु दु । शंखधर व नेपाल संवत् सम्वन्धी प्रचार प्रसार याना वयाच्वंगु उत्कृष्ट संचार माध्यमयात बिइगु कथं पलिस्था जूगु थुगु सिरपा नेपाल संवत्‌ सम्वन्धी न्ह्यथनेबहःगु ज्या याःगु संघ संस्था व व्यक्तियात नं बिइगु क्वःज्यू कथं थुगुसी पासा पुचः गुथि यूकेयात थुगु सिरपा लःल्हायेत्यंगु खः ।

लुमंके बहःजू, थगुने थुगु सिरपा नेपालमण्डल डट कमयात लःल्हाःगु खः ।

More Stories Like this