एमालेया शुद्धीकरण सुयागु लागिं?

नेपाःया वामपन्थी राजनीतिइ थःगु हे कथंया भूमिका दुगु पार्टी नेकपा (एमालें) आः स्वलायंकं पार्टी सुदृढीकरण व शुद्धीकरण अभियान न्ह्याकेगु तयारी याःगु दु। अभियानया घोषणा जुइधुंकूगु दुसा आः थीथी थासय् ज्याझ्वःत याना वनेगु नं क्वःछिउगु दु। एमालेपाखें पार्टी शुद्धीकरणया थ्व घोषणा याःगु इलय् हे गुलिखे कार्यकर्तातय्सं शुद्धीकरण ज्याझ्वःया औचित्यय् न्ह्यसः नं तया हःगु दु। एमालेयात शुद्ध यायेमाःगु ला दु तर गुकथंया शुद्धता? नेतातय्गु जीवन शैली थुलि विलासी जुइधुंकल कि आः कार्यकर्ता हे मछालेमाःगु अवस्था दु। एमाले नेतातय्गु छेँ, गाडी, सन्तानं उपभोग यानाच्वंगु सुख सयल आः न्हापाया पञ्चायती नेतातय्गु स्वयां कम मजुइधुंकल। बुधवाः एमालेया ज्याकुथी शुद्धीकरण अभियान घोषणा जूगु ज्याझ्वलय् हे नेतातय्सं गया वःगु न्हून्हूगु मोडेलया गाडीतय्सं उमिगु आगं कना बिल। थनिं नीदँ न्ह्यः वय्कःपिं भूमिगत राजनीति यानाच्वंगु इलय् ला झीगु न्ह्यःने चप्पल न्ह्यानाः पैदल हे इरुथिरु जुयाच्वनीगु खः। तर खुल्ला राजनीतिइ प्रवेश जूगु नीदँया दुने वय्कःपिनि जीवनशैली थुलि तःधंगु हिउपाः गुकथं वल? थ्व अवधिया दुने सम्पूर्ण नेपाली जनताया जीवनय् हे हिउपाः वःगु खःसा वय्कःपिनि हिउपाःयात नं सहज धाये फइगु खः। वय्कःपिनि हिउपाः असहज व अस्वाभाविक जक मखु शंकास्पद समेत जू। लाका कयाः जूसां सरकारी सुविधा मत्वःतेगु नेतातय् चरित्रं पार्टीया छबी तकं बुलुया वनाच्वंगु दु। उकिं एमालें आः याइगु शुद्धीकरणं नेतातय् थ्व स्थितियात समेत थीगु खःसा थुकिं पार्टी शुद्ध जक मखु सुदृढ नं जुइ, मखुसा थ्व कार्यकर्ता भुले यायेगु चटक जक जुइ ।

More Stories Like this