थापायात प्रम दयेकेगु प्रस्ताव
प्रस्ताव तःम्ह वैद्य खःसां डिजायन याःम्ह प्रचण्ड
येँ (सन्ध्या टाइम्स)/राष्ट्रिय सहमतिया सरकार गठन यायेगु चर्चाया नापनापं उज्वःगु सरकारया नेतृत्व माओवादीया महासचिव रामबहादुर थापा (बादल) यात याकेगु आन्तरिक कासा नं सुरु जूगु खँ सीदुगु दु। राष्ट्रिय सहमतिया सरकार गठन यायेबलय् उकिया नेतृत्व थापायात याके माली धकाः माओवादीया वरिष्ठ उपाध्यक्ष मोहन वैद्य किरणं प्रस्ताव समेत तयादीगु खँ पिहां वःगु दु ।
तर विज्ञ सूत्रं धाःसा थापायात प्रधानमन्त्री दयेकेगु प्रस्ताव मोहन वैद्यं तःगु खःसां उकिया डिजायन दयेकूम्ह धाःसा पार्टी अध्यक्ष प्रचण्ड हे खः धाःगु दु। अध्यक्ष प्रचण्डं छुं न्हि न्ह्यः तिनि वैद्ययात ज्वनाः थुकिया बारे तयारी सुरु यानादीगु खः। वय्कलं वैद्ययात ज्वनाः एमाले अध्यक्ष झलनाथ खनालया छेँय् वनाः नापलायेगु ज्या तकं याःगु खः। वहे इलय् वय्कलं थापायात प्रधानमन्त्री दयेकेगु रणनीति नं दयेकादीगु खः ।
माओवादी दुने डा. बाबुराम भट्टराईयात प्रधानमन्त्री दयेकेवं मेम्ह उपाध्यक्ष मोहन वैद्य पक्ष असन्तुष्ट जूगु खः। उकिं वैद्य पुचलं थौंकन्हय् पार्टी हे तछ्यायेगु तकया ख्याच्वः समेत बियाहःगु दु। थ्व इलय् यदि वैद्य पक्षयात प्रधानमन्त्री दयेकल धाःसा पार्टी दुनेया कचवं साम्य जुइगु आशा यासें प्रचण्डं भट्टराईयात चीकाः वैद्य पक्षयात प्रधानमन्त्री दयेकेगु रणनीति दयेकादीगु खः ।
डा. बाबुराम भट्टराईयात प्रधानमन्त्री दयेकाः दिनाच्वंगु शान्ति प्रक्रिया व संविधान च्वज्याया ज्या न्ह्याकेधुंकाः आः भट्टराईया ज्या मंत धासें प्रचण्डं प्रधानमन्त्री हीकेगु कुतः यानाच्वंगु खः। आःया पालय् प्रधानमन्त्री जुइगु पाः नेपाली कांग्रेसया खःसां कांग्रेस दुने प्रधानमन्त्री जुइगु खँयात कयाः तःधंगु विवाद वइगु जुयाः सभापति सुशील कोइरालां थःगु पार्टीयापिं प्रधानमन्त्री मजूसां जिउ धइगु मती तयाच्वंगु दु। उकिं नं रामबहादुर थापा प्रधानमन्त्री जुइगु सम्भावना दयेफुगु सूत्रया दावी दु ।
थापायात स्वीकार याये मखु: कोइराला
माओवादीया वरिष्ठ उपाध्यक्ष मोहन वैद्यं थःगु पक्षया महासचिव रामबहादुर थापा (बादल) यात राष्ट्रिय सरकारया नेतृत्व याकेगु प्रस्ताव तःगु खँ न्ह्यःने वयेवं नेपाली कांग्रेसया सभापति सुशील कोइरालां थापायात प्रधानमन्त्रीया रुपय् स्वीकार याये मफइगु खँ धयादीगु दु। थौं सुथय् वय्कःया छेँय् सञ्चारकर्मीतलिसे खँ ल्हासें वय्कलं आःया पालय् प्रधानमन्त्री जुइगु अवसर नेपाली कांग्रेसयात वयेमाः धासें थापायात थःपिंसं समर्थन याये मफइगु खँ धयादीगु खः ।
