दलित हत्या विरुद्ध बाग्लुङ व रुकुम बन्द

येँ (सन्ध्या टाइम्स)/भुतुली थिल धकाः छम्ह दलितयात स्याना बिउगु विरोधय् थौं दलित धिकारकर्मीतय्सं बाग्लुङ व रुकुम बन्द याना बिउगुलिं अनया जनजीवन प्रभावित जूगु दु। कालिकोटया जुविथा गाविसया ३१ दँ दुम्ह मनवीर सुनारयात वंगु शनिवाः अनया जसबहादुर साहीया होटलय् च्वंगु भुतुली चुरोस च्याकः वंगु इलय् ठकुरीया भुतू थिल धकाः स्थानीय मनूतय्सं दा जक दायाः स्याना बिउगु खः। उकिया हे विरोधय् थौं दलित उत्पीडित सुमदायया संजालं बन्द आह्वान याः कथं बाग्लुङ व रुकुमया सम्पूर्ण पसः, यातायात, कलकारखाना, शैक्षिक संस्था तकं ठप्प जूगु दु। बन्द आह्वनकर्तातय्सं थौं सुथंनिसें हे बाग्लुङ बजारय् नाराबाजी यानाः प्रदर्शन यानाच्वंगु दु। बन्दं यानाः येँ, पोखरा, नारायणगढ, बुटवल, वीरगञ्ज नापं थीथी थासय् चले जुइगु सवारी साधन तकं चले मजुयाः यात्रुत न्यासि हे वनेत बाध्य जुयाच्वंगु दु ।

दलित अधिकारकर्मीतय्सं दोषीयात ज्वनाः कारवाही यायेमाःगु, छुवाछूत मुक्त राज्य घोषणा यायेमाःगु माग यासें उगु बन्द आह्वान याःगु खः। हत्या काण्डया विरोधय् रुकुम सदरमुकाम नं पूर्ण रुपं ठप्प जूगु दु। बन्द आह्वानकर्तातय्सं कथि ज्वनाः नाराबाजी यासें प्रदर्शन यानाच्वंगु दु ।

थ्वहे दथुइ राष्ट्रिय दलित मुक्ति मोर्चा, नेपाल दलित संघ, नेपाल उत्पीडित जातीय मुक्ति समाज, दलित सेवा संघ, नेपाल सुनचाँदी व्यवसायी संघ नापं मेमेगु सगठनतय्सं नं हत्याया विरोध याःगु दु ।