धर्मोदय सभाया प्यंगू पद निर्विरोध
येँ (सन्ध्या टाइम्स)/धर्मोदय सभाया स्थगित जुयाच्वंगु ६८ क्वःगु महाधिवेशन कन्हय् यायेत्यंगु दु। किपुली संघनायक भिक्षु अश्वघोष महास्थविरं महाधिवेशनया उलेज्या यानाबिज्याइगु ज्याझ्वः दु। कन्हय् उलेज्या व बन्द सत्र जुइसा आइतवाः न्हूगु कार्यसमिति ल्यज्या जुइ।
धर्मोदय सभाया महासचिवय् रत्नमान शाक्य, कोषाध्यक्षय् त्रिरत्न तुलाधर, सहसचिवय् अशोकानन्द वज्राचार्य व सह कोषाध्यक्षय् निर्मला कंसाकार निर्विरोध निर्वाचित जुइधुंकूगु दु। न्याम्ह उपाध्यक्ष पदया लागिं खुम्हेस्यां उम्मेदवारी बिउगु दुसा सचिव पदय् सागरमान वज्राचार्य व पुष्परत्न शाक्यं उम्मेदवारी बियादीगु दु। अथे हे न्हय्म्ह कार्यकारी दुजःया लागिं च्याम्हेस्यां उम्मेदवारी बियादीगु दु ।
सचिवय् उम्मेदवारी बियादीम्ह सागरमान वज्राचार्यं अनुभवया कदर यासें थःत मत बीत इनाप यानादीगु दुसा मेम्ह उम्मेदवार पुष्परत्न शाक्यं धर्मोदय सभायात पुनर्जागरित यायेत थःत मत बीत इनाप यानादीगु दु ।
