'पलाः'या शुभमुहूर्त
नेपालभाषाया न्हूगु संकिपा 'पलाः'या शुभमुहूर्त म्हीग कमलादीइ जुल। क्रियटिभ प्रोडक्सनया न्ह्यब्वया कथं सरु शाहीं निर्माण यानादीगु थुगु संकिपाया निर्देशन मनोजराज शाहीं यानादीगु खः। अन्जला नकःमि मू नकिं जुयाः म्हितादीगु थुगु संकिपा ध्यबा दु धकाः घमण्ड याइपिं मनूतय् मस्त मखुगु खँय् लाः वनीगु बाखं कःघाना तःगु दु।
संकिपाय् सुजृश महर्जन, सबिन बैद्य, सुरेन्द्र मानन्धर, रेवन्त लाल श्रेष्ठपिंसं म्हितादीगु दु। नेवाःतय् थीथी सांस्कृतिक ज्याझ्वलय् ब्वति काये धुंकूपिं नेवाः कलाकारपिनि प्रतिभाया सदुपयोग यायेगु ताः तयाः थगु संकिपाया निर्माण यानागु खँ निर्मातातय्सं कनादीगु दु।
थुगु संकिपाया सुटिङ आः वइगु पुस १० गतेनिसें सुरु जुइसा चैत्र मसान्त तकया दुने क्वचायेकेगु ताः तयातःगु दु ।
