सम्पत्तिइ हदबन्दी मतइगु जुल

आः संविधान निर्माणया १६ बुँदाय् जक विवाद

येँ (सन्ध्या टाइम्स)/अकुत सम्पत्ति कमे याइपिंत व अथाह जग्गा मुंकीपिंत हदबन्दी तयेमाः धकाः माओवादीं न्हापांनिसें याना वयाच्वंगु अडान थौं त्वःतूगु दु। थौं सुथय् च्वंगु विवाद समाधान उपसमितिया बैठकं सम्पत्तिइ हदबन्दी मतयेगु निर्णय याःगु खः ।

माओवादी समेत च्वनाः याःगु उगु बैठकं सम्पत्तिइ हदबन्दी तयेमाः धकाः माओवादीं न्हापांनिसें याना वयाच्वंगु अडान त्वःतूगु कारणं आः सम्पत्तिइ हदबन्दी मतयेगु बरु अप्वः सम्पत्ति दुगु जानकारी वल धाःसा वयात करया मात्रा अप्वयेकेगु खँय् सहमति जूगु दु। सम्पत्तिया हदबन्दी सम्बन्धी खँ नं संविधान निर्माणया ज्याय् विवादया छगू बुँदा जुयाच्वंगु खः ।

अथे हे अथाह जग्गा मुंकेगु सवालय् नं संविधानय् हल्का प्रावधान तयेगु खँ जूगु दु। जग्गाया सवालय् हदबन्दी लागू यायेगु तर हदबन्दी स्वयां अप्वः दुगु जग्गाया सवालय् राज्यं मुआब्जा पुलाः राष्ट्रियकरण यायेगु सहमति नं जूगु दु। माओवादीं न्हापा हदबन्दी स्वयां अप्वः दुगु जग्गा राज्यं स्वतः हे राष्ट्रियकरण याना छ्वयेमाःगु माग याना वयाच्वंगु खः ।

विवाद समाधान उपसमितिया थौं च्वंगु बैठकं थ्व बाहेक युद्ध अपराध, मानवता विरोधी अपराध व आम नरसंहार थेंज्याःगु ज्याय् संलग्न जूपिंत कानुनी कारवाही याये दइगु प्रावधान तयेगु खँय् नं सहमति याःगु दु। आम नरसंहार धायेबलय् जातीय, भाषिक विद्वेषया कारणं आपालं मनूतय्त छथाय् तयाः स्याना छ्वयेगु थेंज्याःगु अपराध लाः वः ।

थौं च्वंगु विवाद समाधान उपसमितिया बैठकं थुपिं लगायत संविधान च्वज्याय् विवादय् लानाच्वंगु प्यंगू विषयय् सहमति याःगु खः। थ्व सहमति लिपा आः संविधान च्वज्याय् १६ गू विषय जक निर्णय याये ल्यं दनि ।

उपसमितिं सहमति याःगु थुपिं विषयतय्त तप्यंक संवैधानिक समितिइ यंकीसा संवैधानिक समितिं संविधानसभाया पूर्ण बैठकय् तइ। संविधानसभाया पूर्ण बैठकं पारित यायेधुन कि तिनि उकियात संविधानय् दुथ्याकेगु ज्या जुइ। विवाद समाधान उपसमिति थीथी पार्टीया प्रतिनिधित च्वनाः हे गठन यानातःगु जूगुलिं थनं पारित जुया वंगु विषयत यदि पार्टीतय् आन्तरिक कचवनं मपन धाःसा संविधानसभाया पूर्ण बैठकं नं पारित याइगु यक्व सम्भावना दु। तर उपसमितिया संयोजक माओवादी अध्यक्ष प्रचण्ड जुयादीगु कारणं थुकिं याःगु गुलिखे निर्णयतय्त उगु हे पार्टीया वरिष्ठ उपाध्यक्ष मोहन वैद्य पक्षं विरोध यानाच्वंगु दु। उकिं वैद्य पुचलं असन्तोष प्वंकूगु विषयत संविधानसभाया पूर्ण बैठकय् पेश जुइबलय् अनुमान याः थें याउँक पारित जुइ वा मजुइ धाये मफइगु विज्ञतय् बिचाः दु। वैद्य पक्षं निगू सदनात्मक व्यवस्था, खस नेपाली भाषायात सरकारी भाषा दयेकेगु आदि खँय् विरोध यानाच्वंगु दु ।