सित धायेधुंकूम्ह मचा सना हयेवं.....
ख्वप (सन्ध्या टाइम्स)/अस्पतालं सित धकाः घोषणा यानाः घाटय् अन्तिम संस्कार यायेत ठिक्क यानातःम्ह छम्ह मचा आकाझाकां सना हयेवं तःधंगु हल्लाखल्ला जूगु दु ।
सूर्यविनायकया माउण्ट एभरेष्ट स्कूलय् ७ कक्षाय् ब्वनीम्ह १३ दँया भाजु कृत्रिम लाखा स्कूलय् हे प्वाः स्याकाः अभिभावकयात सःतूगु जुयाच्वन। तर छेँय् यंकाः नं मजिउसेंलि कान्ति अस्पताल यंकल। कान्ति अस्पतालं नं जी मखुत धायेवं अन हे लिक्क च्वंगु छगू नर्सिङ्ग होमय् यंकल। तर अन थ्यंकाः मचायात मृत घोषणा यात। लिपा मचायात थनया खोह्रे घाटय् हयाः अन्तिम संस्कारया तयारी यात। थौं सुथय् ४ बजे घाटय् हयाः अन्तिम संस्कार कथं लः त्वंकेगु ज्या जुयाच्वंबलय् आकाझाकां मचा सना हल। थुकिं यानाः अन हल्लाखल्ला जुल। मचा म्वाःनि थें च्वं धकाः वयात मि च्याकाः क्वाकेगु कुतः यात। लिसें तुरुन्त हे नर्सिङ्ग होमया डाक्टर नं सःतल। तर डाक्टरं परीक्षण याःबलय् मचा सीगु हे खः धाल। डाक्टरं धाः कथं मचायात एपेन्डिक्स जूगु जुयाच्वन। प्वाथय् एपेन्डिक्स तज्यानाः अन्तिम सासः ल्हाये कथं अथे सना हःगु जुयाच्वन। वयां लिपा थौं हे सुथय् मचाया अन्तिम संस्कार याना छ्वत ।
स्कूलय् प्वाः स्याकूम्ह मचायात अभिभावकपिंसं छेँय् यंकाः तुरुन्त अस्पताल मयंकुसे पुजा निं यानाच्वंगुलिं अपरेशन याये लिबानाः सीगु खँ डाक्टरं धाःगु दु। मचा ख्वप नपा ६ वडाया चोर्चा त्वालय् च्वंम्ह खः ।
