शान्ति प्रक्रिया प्रमया टेबुलय्: माधव
येँ (सन्ध्या टाइम्स)/एमालेया वरिष्ठ नेता नापं पुलांम्ह प्रधानमन्त्री माधव नेपालं शान्ति प्रक्रिया प्रधानमन्त्रीया टेबुलय् थानाच्वन धयादीगु दु। गबलें पार्टी दुनेया विवाद, गबलें शिविर खालि यायेगु त्वहः तयाः अलमल यासें प्रधानमन्त्री भट्टराईया कारणं हे शान्ति प्रक्रियाया फुक्क विषय थानाच्वंगु द्वपं नं वय्कलं बियादीगु दु ।
दोलखा एमालेपाखें थौं सुथय् ग्वसाः ग्वःगु ज्याझ्वलय् न्ववासें नेता नेपालं थ्व द्वपं बियादीगु खः। थःपिनि दुनेया हे ल्वापुया कारणं प्रधानमन्त्रीं मुलुकयात हे गतिहीन याये मजिउगु बिचाः नं वय्कलं प्वंकादिल। मंसीर महिनाया दुने फुक्क प्रक्रिया पूवंकेगु धाःसां नं अथे याये मफुगु खँ न्ह्यथँसें वय्कलं पुस २ गते जुइगु विशेष समितिया बैठक शान्ति प्रक्रियाया नितिं निर्णायक जुइमाः धयादिल ।
समायोजनय् वनेत तयार जूपिं शिविरया लडाकुतय्त नेपाली सेनाया जिम्मा बीमाःगु नापं दक्ष मनूतय्त जक ल्ययेमाःगु खँ बः बियादिसें नेता नेपालं सहमति कथं खुद्वःत्या लडाकुयात जक समायोजन याये फइ धकाः नं धयादिल ।
