बहिष्करणपाखें हानं द्वन्द्वया खतरा
येँ (सन्ध्या टाइम्स)/'बहिष्करणय् लाकातःपिं समूदायया मुद्दा व सम्भावित द्वन्द्व' विषयक भेला नेवाः देय् दबूया ग्वसालय् परामर्श ज्याझ्वः जुल। दबूया नायः नरेश ताम्राकारया सभापतित्वय् न्ह्याःगु उगु ज्याझ्वलय् राजनीतिक विश्लेषक श्याम श्रेष्ठं ज्यापौ न्ह्यब्वयादीगु खः। ज्यापती संविधान निर्माणया प्रक्रिया न्यानाच्वंगु इलय् संविधानसभां दयेकूगु थीथी प्यंगू समितिया प्रतिवेदन अध्ययन यानाः उकी दुथ्याकेमाःगु, दुमथ्याकुसें मगाःगु व छुटे जूगु खँत इलय् हे वाःचायेकाः समावेश यायेमाःगु खँ न्ह्यथनातःगु दु ।
ज्यापती ग्रामिण औद्योगिक क्रान्ति आवश्यक जूगु तर थ्व अधिकार गाविसयात बिया मतःगु, मिसा अपांग संरक्षण यायेत बियातःगु कर प्रणाली स्थानीय निकाययात बिया मतःगु, नेपाली भाषायात सरकारी ज्याखँया भाषा यानातःगु आदि समस्याय् ध्यान बीमाःगु न्ह्यथँसे भाषिक व पहिचानया अधिकार छुटे याये मजिउगु व म्वाःगु खँया लिउलिउ जुयाः मजिमगाःगु खँ त्वःफिके मजिउगु खँ नं उल्लेख याना तःगु दु ।
अथे हे ज्याझ्वलय् सभासद्पिं डा. मंगलसिद्धि मानन्धर, ध्यानगोविन्द रंजीत, शीला कतिला नापं मंगल विश्वकर्मा, दमर पहाडी, डा. महेशमान श्रेष्ठ, उमेश स्थापित, मनोज नेवाः खड्गी, गणेश बिके, माइलाबाबु द्यःला, फरिसदा खातुन, रामजी पौडेल, सुवर्ण बज्राचार्य, केबी घःजु, गजेन्द्र मानन्धरपिंसं नं टिप्पणी यानादीगु खः। ज्याझ्वलय् नेवाः देय् दबूया मूछ्यांज्ये रजनी मिलां लसकुस यानादीगु खः ।
