माओवादी विभाजन जुइगु न्हूगु ख्याच्वः

वंगु छुं ई न्ह्यवंनिसें आन्तरिक कचवंया गालय् लानाच्वंगु सत्तारुढ पार्टी एनेकपा (माओवादी) या सचिव सीपी गजुरेलं 'आः पार्टी तज्याःगु घोषणा जक याये ल्यं दनि' धकाः बियादीगु अभिव्यक्तिं देय्या राजनीतिइ तःधंगु हे हलचल हया बिउगु दु। पार्टीया आन्तरिक कलह आः गन तक थ्यनेधुंकल धइगु खँ गजुरेलया थ्व अभिव्यक्तिं बांलाक हे उला बिउ। यद्यपि वय्कःया नेता वरिष्ठ उपाध्यक्ष मोहन वैद्यं धाःसा पार्टी तज्याइ धकाः गजुरेलं बियादीगु अभिव्यक्ति सही मखु धकाः पार्टी अध्यक्ष समक्ष स्पष्टीकरण बियादी धुंकूगु दु ।

शान्ति प्रक्रियायात सफल यायेगु झ्वलय् माओवादी लडाकुयात समायोजन व पुनर्स्थापना यानाः मदयेका छ्वयेगु प्रक्रिया न्ह्यासांनिसें माओवादी दुने थ्व कचवं सी दयेक हे खने दया वःगु खः। उकिसनं लडाकुया ल्वाभः तयातःगु कन्टेनरया ताःचा सरकारयात लःल्हासां निसें पार्टीया कचवं तस्वाः जुयावंगु खः। वयां लिपा लडाकुया पुनर्वर्गीकरण लिपा थ्व ल्वापु झन हे चर्के जुया वन। छखे असन्तुष्ट नेतातय्सं थःगु आक्रोश प्वंका हे च्वनसा मेखे शान्ति प्रक्रियाया ज्या नं न्ह्याः हे वनाच्वन। उकिं असन्तुष्ट पक्षं वास्तवय् धायेत स्वःगु छु खः धइगु खँ प्रस्ट मजुया वन। यदि आः जुयाच्वंगु ज्या गलत खःसा सही छु खः धकाः वय्कःपिंसं विकल्प नं बियादीगु मदु। केवल विरोध हे जक यानाच्वंगु दु, व नं ठोस रुपं मखु। आः ला स्थिति थन तक थ्यनेधुंकल कि वय्कःपिंसं पार्टी विभाजन हे याःसां नं शान्ति प्रक्रिया दीगु अवस्थाय् मदु। उकिं थ्व इलय् स्थितियात थुइकाः पार्टीयात छधी यासें 'बार्गेनिङ' शक्ति अप्वयेका यंकेगु हे उमिगु हित जुइगु लँ जुइ ।

More Stories Like this