याकनं भ्रमणया न्हूगु तिथि क्वःछीमाः

चिनियाँ प्रधानमन्त्री वेन जियाबाओं याइगु धकाः बय्बय् जुयाच्वंगु नेपाः भ्रमण आखिरय् वयाः स्थगित जूगु दु। वय्कःया नेपाः भ्रमण गुलि अर्थपूर्ण जुइगु खः थुकिया स्थगन व स्वयां नं अप्वः अर्थपूर्ण जूवंगु दु। नेपालय् नं चिनीयाँ प्रभाव अप्वयाच्वन धकाः विश्लेषण जुयाच्वंगु व मेखे भारतया सुं हे प्रधानमन्त्रीं नेपाः भ्रमण मयाः धकाः चर्चा जुयाच्वंगु इलय् लाक्क जुइत्यंगु चिनीयाँ प्रधानमन्त्रीया थ्व भ्रमणं नेपाः-चीन स्वापुती तःधंगु हे अर्थ तइगु आशा जुयाच्वंगु खः। तर करिब करिब अन्तिम इलय् वयाः नेपाःपाखें छुं वाचखाम हे काये मफयेक चीनं भ्रमण स्थगनया जानकारी बियाहःगुलिं नेपाः स्तब्ध जूगु दु। चीन न्ह्यागु ज्या नं अतिकं सोच यानाः व तौल यानाः नं सम्पन्न याइगु शान्त कुटनीतिइ माहिर देय् खः। उकिं वं याःगु थ्व नेपाः भ्रमणया स्थगन लिउने नं अज्याःगु हे शान्तपूर्ण अर्थ सुलाच्वंगु दयेमाः व दु धकाः सहज रुपं अनुमान यायेछिं। भ्रमण स्थगनयात कयाः थीथी कथंया खँ न्ह्यःने वयाच्वंगु दु। भ्रमणया न्ह्यःने मधेसी मोर्चां प्रम डा. भट्टराईया सरकार क्वःथले धकाः बिउगु ख्याच्वः, चीनलिसे जुइत्यंगु बिप्पा सम्झौतायात कयाः भारतं प्वंकाहःगु आशंका, भ्रमणया विरोधय् तिब्बती शरणार्थीतय्सं तःधंगु प्रदर्शन यायेत यानाच्वंगु तयारी, चीनं स्वयां न्हापां नेपालं भ्रमणया तिथि सार्वजनिक याःगु आदि थीथी कारणत चर्चाय् दु। तर कारण न्ह्यागु हे खःसां प्रम जियावाओया थ्व भ्रमण स्थगित मजूसा यक्व बांलाःगु खः। भ्रमण स्थगनं अनावश्यक अर्थत काः वने न्ह्यः हे निगुलिं देय् जानाः याकनं हे मेगु भ्रमणया न्हूगु तिथि तय यायेगु पहल जुइमाः।

More Stories Like this