दः संकाच्वनी

नर्मदेश्वर प्रधान

म्हिगःया घाः ल्वःमंकी। प्रमया थ्व उजंया वर्गीय विश्लेषण जुइमाः। शान्तियात तार्किक निष्कर्षय् थ्यंकेमाः। थ्व हौवा सृजना यानाः न्ह्याम्हेस्यां न्ह्याक्व भ्रष्टाचार याःसां जिउ ला? थःगु अथाह धन सम्पत्तिया बचावतया लागिं अनाथ व सडक बालकतय्त उपहास याःसां जिउ ला?
खँयाखँय

गुलिस्यां धाइ "थौंकन्हय् टिभी मस्वयेधुन। स्वयां छु याये? नुगः जक खलबल जुइ। बांलाःगु भिंगु न्यने दइगु मखु। वहे मुलुवहे सुका। सँ छपु नं उखे थुखे जूगु मखु।" "एफएम चायेके। नेतातय् अन्तर्वार्ता वयाच्वनी। न्यने। न्यंलिसे कपाः क्वाना वइ। तंया पारा चढे जुइ। रेडियो तिना छ्वये।" थथे धाइपिं नं यक्व दु। थौं। आमसञ्चारया युग। टिभी, एफएमपाखें यक्व सयके सिके जिउ। बुद्धि वृद्धि याये जिउ। विचार परिमार्जित यायेफु। तर थौं देशय् अथे मखु। टिभी, एफएम न्यने। मदुगु दुःख पीगु जुइ। नुगलय् तं, तनाव चर्के जुइ। दुगु शान्ति भङ्ग जुइ। भिंगु गतिलाःगु खँ न्यने दइगु मखु। टिभी, एफएमप्रति थौंकन्हय् नकारात्मक धारणा खने दइ। वितृष्णा ब्वलना वइ। थौं दर्शक, श्रोतातय् मानसिकता गन थ्यन? थ्व वितृष्णाबोधं ब्वया बी।
जिं टिभी स्वयेगु तसकं हे म्हो जुइ। गुलिस्यां सिरियल स्वइ। जितः स्वये मयः। मस्तय्सं कार्टुन तइ। जिं स्वयेगु समाचार, अन्तर्वार्तात खः। एफएम न्यने। समाचार व अन्तर्वार्ताय् ध्यान वनी। टिभि हायेके। जिगु पहः खनी। छेँजःत फुक्क उसिउसि चाइ। रिमोट ल्हाती तये। च्यानल हिकाच्वने। कलातं धाइ, "छु मस्त थें रिमोट म्हितकाच्वनागु?" जिं सिउ रिमोट जिं मदिक्क संकाच्वने। थुकिया कारण दु। मार्मिक कारण। जःखः दुपिंसं थ्व सीके फइ मखु। उकिं इमिसं धाइ-रिमोट म्हितकाच्वन। तर यथार्थय् अथे मखु। रिमोट जिं छाय् संकाच्वने ! कारण दु। टिभी चायेके। म्हिगः। प्रधानमन्त्रीया अन्तर्वार्ता वयाच्वन। पलख न्यने। न्हूगु छुं खँ धाइ ला? आशा याये। छता निता खँ छु न्यने। न्यनेमास्ति वइ मखु। च्यानल हीके। लिक्क च्वंपिं अजूचाइ। गुज्वःम्ह लुधंके थाकुम्ह ! प्रधानमन्त्री थुज्वःम्हेसिया अन्तर्वार्ता हे न्यने मयःम्ह। अझ इमि मन मनं धाः जुइ। गपाय्धंम्ह थ्व ! जिं असन्तोष मनस्थितिं रिमोट संकाच्वने। देय्या परिस्थितिं जिगु नुगः गुलि अस्थीर जुइधुंकल। थुकिं संकेत यानाच्वनी। तर थ्व थुइकीगु सुनां?
अथे हे एफएम न्यने। स्टेशनत हीकाच्वने। देशया परिस्थिति। जिगु अस्थीर मनस्थिति। रेडियो न्यनेबलय् प्रस्ट जुइ। नेतातय् अन्तर्वार्ता, फोनइन कार्यक्रमत वयाच्वनी। गबलें गबलें न्यने। फटाहा, झेल्याः, जाली खँत गय् गुकथं ल्हायेगु? व विधि, कला, प्रशिक्षणया निंतिं इपिं तसकं हे ज्याख्यले दइ। खुँखँ ल्हायेगु ज्याखँय् नेता, कार्यकर्तात गुलि माहिर, गुलि दक्ष। इमिगु अन्तर्वार्ता, भाषणं प्रस्ट जुइ। छुं खँ भिंगु, बांलाःगु न्यने दइला ! नुगलय् मृगतृष्णा दयाच्वनी। रेडियो स्टेशन उखेंथुखें संके। हीके। फि पेले यानाः गनं चिकं पिहां वइ?
उकुन्हु। रिमोट ल्हाती काये। संके। छगू अन्तर्वार्ता वयाच्वनी। मन्त्री ह्दयेष त्रिपाठीया। पलख न्यनेत स्वये। भ्रष्टाचारया बारे न्ह्यसः तयाच्वंगु खनिं। मन्त्रीं गुकथं खँ चाःहीकी। खँ खँ ल्हाइ। अग्रिम अनुमान मदुगु मखु। अय्नं धैर्य काये। न्यने। "छिं भ्रष्टाचार याना कि मयाना?" मन्त्री त्रिपाठीयात न्ह्यसः तइ। मन्त्रीं उत्तेजित मुद्राय्फुर्ति क्यनी। चुनौतिपूर्ण सलं लिसः बी। "जि छु अनाथालयय् ब्वलंम्ह ला? सडक बालक ला? जि छु हैसियतबिहीन ला भ्रष्टाचारया द्वपं बीत? थाय्थासय् प्रवचन यानाः जिं कमे यानागु दु। जिगु सम्पतिप्रति अनावश्यक शंका छाय्?" मन्त्री त्रिपाठीया तर्क जुइ। व थः भ्रष्टाचार यायेमाःम्ह मनू मखु। अनाथालयय् ब्वंलंम्हेसित थें थःत भ्रष्टाचारी धाल। वं तं पिकाइ। थःगु धन, सम्पत्तिया बचावत याइ। वयागु खँ न्यने। जितः मती तिक्क मिनी। मन्त्री त्रिपाठीं थःगु बचाउया लागिं अनाथालयया विम्व छाय् छ्यल? दः ताल। थ्व वया घोर आपत्तिजनक लिसः खः। अनाथालयय् ब्वलंपिं लिपा वनाः भ्रष्टाचारी जुइ। वया थ्व कुतर्क अनाथजनप्रति घोर अपमान खः। वया थ्व सामन्ति संस्कारया प्रदर्शन खः। भ्रष्टाचार अनाथालयय् ब्वलंपिंसं याइ। वया थ्व तर्क दुर्नियतपूर्ण पैरबी गलत खः। भ्रष्टाचारया केन्द्र थौंकन्हय् अकुत सम्पति दुपिं धनी वर्ग जुयाच्वंगु दु। आर्थिक हैसियतं सम्पन्न जूपिंसं हे देशयात लुटे यानाच्वंगु दु। थः सम्पन्न। भ्रष्टाचार छाय् यायेमाःगु? मन्त्री त्रिपाठीया थ्व गर्जन। मात्र कुतर्क खः। आयस्रोत छर्लङ्ग छाय् याये मफुत वं? निथाय् प्यथाय् प्रवचन यायेवं करोडौं दां आम्दानी याये फइगु वया छु दक्षता खः? जनतां सीके दयेमाः। प्रधानमन्त्री भट्टराईं थौंकन्हय् धयाच्वनी "म्हिगःया घाः ल्वःमंकेमाः। शान्तियात तार्किक निष्कर्षय् थ्यंकेगु थौंया प्रमुख ज्या खः।" प्रधानमन्त्री भट्टराईया राजनैतिक हैसियत क्रान्तिया उपज खः। वर्ग संघर्षया लँय् थः पथिक खः। वय्कःया दावा जुइ। म्हिगःया घाः ल्वःमंकी। प्रधानमन्त्री भट्टराईनं थःगु राजनैतिक दर्शन, मान्यताया आधारय् थःगु थ्व धापूया अर्थ छु प्रस्ट यायेमाः। वर्ग संघर्षया तार्किक निष्कर्ष धइगु व शान्ति प्रक्रियाया तार्किक निष्कर्ष धइगु वहे खःला? मार्क्सवादी दर्शनप्रति जिज्ञासुपिंत प्रम भट्टराईं स्पष्ट यायेमाः। म्हिगःया घाः ल्वःमंकी। प्रमया थ्व उजंया वर्गीय विश्लेषण जुइमाः। शान्तियात तार्किक निष्कर्षय् थ्यंकेमाः। थ्व हौवा सृजना यानाः न्ह्याम्हेस्यां न्ह्याक्व भ्रष्टाचार याःसां जिउ ला? थःगु अथाह धन सम्पत्तिया बचावतया लागिं अनाथ व सडक बालकतय्त उपहास याःसां जिउ ला? वर्ग विभेदया अन्त धाःगु थ्वहे खः ला? जि व्यवहारिक राजनीतिज्ञ मखु। थ्व न्ह्यसलय् व्यवहारिकता मदयेफु। जि दर्शनया विद्यार्थी। दार्शनिक न्ह्यसःतसें दः संकाच्वनी। सुम्क तइ मखु।

More Stories Like this