एमाले बलीया दुगुचा ?

सम्पादकजु,

'बलीका बकरा' । थ्व मधेशी खँग्वः खःसां झीगु नेपालभाषां 'बली' बीत तयातःम्ह दुगु धाःगु खः । अथे धयागु सुं द्यःया न्ह्यःने पालेत वा स्यायेत तयातःम्ह दुगुचा । आः थ्व थौंकन्हय् नेपाःया राजनीतिक ख्यलय् नेपाली कंगे्रसं नेकपा एमाले यात बलीयाम्ह दुगुचा दयेकेत तयार यानाच्वंगु खनासा एमाले थःपिं नं न्हिलाः न्हिलाः दुगु जुइत तयार । स्वयादिसँ थौंया नेपाःया परिस्थिति । माओवादीं राजिनामा बीवं जनतायात बेवकुफ यायेत खप्पिसिपं थः प्रधानमन्त्री जुइया निंतिं थवंथः हे तुति साला जुईपं कांग्रेसया नेतात थौं याउँक एमालेयात सत्ताय् थ्यंकेया निंतिं ब्वाँय् जुयाच्वन । जनमतयात तकं हाकुतिनाः प्रधानमन्त्रीया निंतिं सविधानसभाय् निगू निगू थासं चनावय् बूम्ह माधव कुमार नेपालयात च्वछाया जुल ।

नेपाली कांगे्रसं बांलाक वाःचाः नेकपा माओवादी बिना सरकार न्ह्याके फइ मखु । वंगु संविधानसभां दकलय् तःधंगु राजनीतिक पार्टी कथं जनतां ल्यःगु धइगु ला माओवादीया खः । उकिं जनताया म्यान्डेट माओवादीयाके जक दु । थ्व फुक्कं खँ नेपाली कंगे्रसया नेतातय्सं बांलाक वाःचाः । प्रचण्डया सरकारं बांलाक ज्या यानाः सफल जुइगु धयागु कंगे्रस व एमालेया निंतिं थःपिं असफल जुइगु खः । उकिं न्ह्यागु दाउपेच यानाःसां माओवादीयात असफल यायेगु लागिं सत्ता साझेदार एमालेपाखें कंगे्रसं थःगु स्वार्थ पूवंकल । अर्थात प्रधानमन्त्री प्रचण्डया सरकारं राजिनामा बीकेत सफल जुल । प्रधानमन्त्रीयाग राजिनामां पिने कंगे्रस खुशी जूसां दुने धाःसा लय्तायाच्वंगु मदु । छाय्धाःसां ईखय् विष नयाः जक एमालेयात सरकार त्वःतेमाःगु खः । याउँक माओवादी विरुद्ध एमालेयात न्ह्यःने थना बिल । थुलि याये दुगुलिं पिने खने दयेक लय्तायाच्वंगु खः एमाले नं दुगु जुइ दयाः लय्ताः । एमालें सरकार या:गु नेतृत्व कंगे्रसं छाय् थःत बिल धकाः बिचाः तकं याःगु खने मदु । ल्वःमंकल कंगे्रस धईपं गुलि बदमास । २०५१/५२ सालपाखें श्रद्धेय नेता मनमोहन अधिकारीया नेतृत्वय् न्ह्यानाच्वंगु सफल सरकारयात क्वःथला बिल । विरामी जुयाः अस्पतालया खाताय् ग्वारातुलाच्वंम्हेसित तकं कंगे्रसं मत्वःतू । हानं नेपाली कंगे्रस सत्ता बिना च्वनेगु धइगु लः मदगु पुखुली च्वनाच्वंिपं न्या थें खः । गिरिजाप्रसादं राजिनामा बी धुंकाः तकं प्यला प्यला तक सत्ताय् प्यपुनाच्वंगु मखाः अज्याःपिं सत्तालोभीतय्गु ग्वाहालिइ सरकार-यागु नेतृत्व कायेगु धइगु एमाले थः 'बलीया बकरा' जूवनेत्यंगु जक मखा ?

- काजी शाक्य,
असं, येँ ।

More Stories Like this