संघनायक व संघउपनायकपिंत हना

येँ(सन्ध्या टाइम्स)/पूज्य भिंक्षु अश्वघोष महास्थविर खुम्हम्ह संघनायक जुयाबिज्याःगु व भिक्षु कुमार काश्यप संघउपनायक जुयाबिज्याःगु लसताय् वंगु यःमरि पुन्हि कुन्हु धर्मकीर्ति विहार संरक्षण समिति कोषया ग्वसालय् धर्मकीर्ति विहार परिवारं हनेज्या यात।
बर्मी गुरुमां मादोगुणवती गुरुमांया सभापतित्वय् जूगु उगु ज्याझ्वलय् कोषया छ्यांज्ये मीना तुलाधरं पुजा यायेबहःपिं गुरुपिंत धर्म पुजा यानाः कुशल कर्म यायेगु लसताया खँ खः धयादिल।
धर्मकीर्ति बौद्ध अध्ययन गोष्ठीया छ्यांज्ये लोचनतारा तुलाधरं हनेज्या जूपिं भन्तेपिनि योगदान बारे चर्चा यानादीगु खःसा कोषया पुलांम्ह छ्यांज्ये कीर्ति तुलाधरं भिंतुना न्वचु बियादिल।
ज्याझ्वलय् कोषया उपाध्यक्ष चमेली गुरुमांनं लसकुस न्वचु बिसें बुद्ध धर्म उत्थानया ज्याय् धिसिलाःगु पलाः न्ह्याकाबिज्याःपिं अभिनन्दित भन्तेपिंत अभिनन्दन पौ लःल्हानाबिज्यातगुकियात कोषया कोषाध्यक्ष रीना तुलाधरं ब्वनाः न्यंकादिल। अथे हे धर्मकीर्ति अध्ययन गोष्ठीया उपाध्यक्ष इन्दावती गुरुमांनं नं भिंतुना न्वचु बिसें अभिनन्दित भिक्षुपिनि योगदानया बारे कनाबिज्याःगु खः। ज्याझ्वलय् संघनायक भिक्षु अश्वघोषं नं नुगःखँ तयाबिज्याःगु खः।