पशुपतिइ प्लाष्टिक बन्द

येँ(सन्ध्या टाइम्स)/पशुपति लागाय् थनिंनिसें प्लाष्टिकया म्हिचा लगायत छुं नं कथंया ज्वलं दुत यंके मदु याःगु दु। प्लाष्टिक झोलाया प्रयोगयात म्हो याना यंकेगु येँ महानगरपालिकाया अभियानयात तिबः बी कथं पशुपति विकास कोषं थनिंनिसें पशुपति लागाय् २० माइक्रोन स्वयां म्हो दुगु प्लाष्टिकया ज्वलं दुत यंकेगुली प्रतिबन्ध तःगु खः। २० माइक्रोन स्वयां म्हो दुगु प्लाष्टिकं वातावरणीय प्रदुषण तसकं अप्वयेकीगु जुयाः अज्याःगु झोलाया उत्पादन तकं पनेमाःगु खँ न्ह्यःने वयाच्वंगु दु। आवंलि पशुपति लागाय् सुनां नं प्लाष्टिकया झोला ज्वना वन व अन हे गनं वांछ्वया थकल धाःसा येँ मनपाया नियमावली कथं कारवाही जुइ धाःगु दु।