जियाबाओ नेपाः वइगु तिथि सुनां पित बिउगु?

येँ(सन्ध्या टाइम्स)/चिनीयाँ नेतात गनं भ्रमणय् वनेत्यंगु दुसा उमिसं भ्रमण मिति सामान्यतया न्ह्यव हे पित बी मखु। भ्रमणया लागिं ताः ई न्ह्यः हे तयारी जुयाच्वंसां मिति धाःसा भचा लिपा हे जक घोषणा याइ। तर नेपाःया मामिलाय् धाःसा अथे मजुल। कुटनीतिक रुपं गोप्य यानातःगु चिनीयाँ प्रधानमन्त्री वेन जियाबाओं नेपाः भ्रमण याइगु तिथि स्वय्म नेपाःया प्रधानमन्त्री डा. बाबुराम भट्टराईं हे सार्वजनिक यानाबिल।
जियाबाओयात नेपाः सःतेगु लागिं उपप्रधानमन्त्री लिसें परराष्ट्रमन्त्री नारायणकाजी श्रेष्ठ थः हे चीन झाःगु खः। भ्रमणया तिथि वय्कलं सिउसां सार्वजनिक धाःसा यानामदी। वय्कलं म्हिगः सञ्चारमाध्यमतलिसे खँ ल्हासें धयादिल, 'भ्रमण मिति जिं सार्वजनिक यानागु मखु। प्रधानमन्त्रीं छगू ज्याझ्वलय् प्रारम्भिक मिति धकाः कंबलय् खँ पिहां वःगु खः।'
चिनीयाँ प्रम नेपाः वइगु तिथि नेपाः व चीनं छक्वलं हे सार्वजनिक यायेगु सहमति जुयाच्वंगु खः। तर नेपालं कुटनीतिक मर्यादायात ध्यानय् मतसे तिथि सार्वजनिक याःगुलिं चीन असन्तुष्ट जूगु जुयाच्वन। जियाबाओं नेपाः स्वयां न्ह्यः याइगु वर्मा भ्रमणया मिति तकं गोप्य यानातःगु खः। उकिं नेपाःया परराष्ट्र मन्त्रालय ला वय्कः चीनं तप्यंक हे नेपाः वइगु जुइ धकाः च्वंगु खः।
मिति न्हापा हे घोषणा जूगुलिं अबलय् विरोध प्रदर्शन यायेगु लागिं तिब्बती शरणार्थीतय्त तयारी यायेगु अवसर चूलाःवंगु चिनीयाँ पक्षया द्वपं दु। आः न्हूगु मिति निगुलिं देशं छक्वलं घोषणा यायेगु ग्वसाः दयेकूगु दु।