स्वम्ह नेताया आकस्मिक बैठक

येँ(सन्ध्या टाइम्स)/एकीकृत माओवादीया सचिव सीपी गजुरेलं 'आः माओवादी पार्टी तज्यात धकाः घोषणा जक याये ल्यंदनि' धकाः बियादीगु अभिव्यक्तिं माओवादी दुने तःधंगु हे हलचल हया बिउगु दुसा थ्वहे विषयय् खँ ल्हायेगु लागिं पार्टी अध्यक्ष पुष्पकमल दाहालं थौं पार्टीया निम्ह उपाध्यक्षपिंत थःगु छेँय् सःताः बिचाः ब्याकूगु दु।
अध्यक्ष दाहालया छेँय् थौं सुथय् बरिष्ठ उपाध्यक्ष मोहन बैद्य व प्रधानमन्त्री लिसें मेम्ह उपाध्यक्ष डा. बाबुराम भट्टराईया दथुइ आकस्मिक बैठक जूगु खः।
बैठकय् अध्यक्ष प्रचण्डं वैद्य पक्षयाम्ह सचिव सीपी गजुरेलं न्ववाःगु खँया बारे न्ह्यसः तयादीगु खःसा उकिया लिसलय् उपाध्यक्ष मोहन बैद्यं सचिव गजुरेलं पार्टी तज्याइ धकाः न्ववानादीगु खँय् छुं हे सत्यता मदु व वय्कःया अभिव्यक्ति गलत खः धयादीगु खः।
लिसें वय्कलं पार्टी तज्याइ मखु व पार्टी तछ्यायेगु थःपिनि छुं ग्वसाः नं मदुगु खँय् नं अध्यक्ष प्रचण्ड व प्रम भट्टराईयात विश्वस्त यानादीगु खः।
उगु इलय् अध्यक्ष प्रचण्डं छुं समस्या दुसा उकियात पार्टी दुने हे तयाः सहलह यासें समाधान याना यंकूसा बांलाः, पिने थज्याःगु अभिव्यक्ति वयेगु पाय्छि मजू धकाः नं सचेत याकादीगु खः।
बैठक लिपा उपाध्यक्ष वैद्यं संचारकर्मीतलिसे खँ ल्हासें गजुरेलया अभिब्यक्ति सही मखु, आः थत्थें हे पार्टी तज्याइगु अवस्था नं मदु व थःपिंसं पार्टीयात मिले यायेगु हे कुतः यानाच्वनागु दु धयादिल।
नेता बैद्यं पार्टी दुने तीब्र रुपं बैचारिक विवाद दुसां आः तत्काल पार्टी तज्याइगु छुं नं आधार मदुगु खँ नं स्पष्ट यानादिल।
संचारकर्मीतय्सं 'छितः पार्टीया कार्यवाहक अध्यक्ष अले महासचिव रामबहादुर थापा बादलयात प्रधानमन्त्री दयेकेत अध्यक्षपाखें प्रस्ताव वल धाःगु खँ छु खः?' धकाः न्यंगु न्ह्यसःया लिसः बिसें बैद्यं धयादिल 'उज्वःगु प्रस्ताव ला वया हे च्वनी।'
माओवादी सचिव सीपी गजुरेलं पार्टी तज्यात धकाः औपचारिक घोषणा जक याये ल्यंदनि धकाः म्हिगः सिन्धुलिइ पत्रकार सम्मेलनय् धयादीगु दु। वय्कलं पार्टी तज्यात धाःसा थःपिनिगु पक्षया नेतृत्व मोहन बैद्य किरणं यानादी धकाः स्पष्ट यासें आः पार्टी तज्यात धाःसा पार्टी प्यकू कुचा जुइ धकाः तकं दावी यानादीगु खः।