आन्दोलनकारी साहित्यकार राजा शाक्य
नेपालभाषा साहित्यय् छम्ह न्ह्यथनेबह:म्ह व्यक्तित्व ख: राजा शाक्य । पंचायतया 'एक भाषा' नीतिया थाकुगु इलंनिसें नेपालभाषाया निति आन्दोलनय् न्ह्यब्वाना वयाच्वनादीम्ह राजा शाक्य भाषिक आन्दोलनकारीनापं छम्ह बालाम्ह साहित्यकारनापं नेपालभाषा स्यनामि नं ख: । थौकन्हय् वयक: 'आशा सफुकुथि' नाप सम्बन्धित जुया ज्या याना च्वनादीगु दु ।
वि.सं. २०२२ सालयात नेपालभाषा भाषिक आन्दोलनया कारण नं यक्व लुमंकेगु या: । रेडियो नेपालं प्रशारण याना वइच्वंगु 'जिवन दबू' दिका व्यूगु विरोधय् नेवा:तय्सं भाषिक आन्दोलनया लहर हे हयाव्यूगु ख: । थुगु आन्दोलन जनकवि दुर्गालाल श्रेष्ठ, इश्वरानन्द लगायत नेवा: व्यक्तित्वपिनि नेतृत्वय् जूगु ख: । उगु आन्दोलनया व्यवस्थापनय् वय्कलं छयाञ्जे जुया: ज्या यानादीगु ख: । खय्तला थुगु खँ गनं इतिहासया रुपय् च्वयाता:गु खनेमदु ।
अथे जूसा भाषिक आन्दोलनया झ्वलय् वय्कलं यानादीगु योगदानयात लुमंके बह:जू । उगु इलय् भाषिक आन्दोलनया स्वरुप हीका त्वा: त्वालय् साहित्य सम्मेलन, संगीत सम्मेलन नं याना: नेवा:तय्त मनोरञ्जन बिसें छगूकथं सचेत यायेगु ज्या नं जूगु ख: । थुगु ज्याय् राजा शाक्यं महत्वपूर्ण भूमिका म्हितादीगु ख: । पुलापिं गायकपिं प्रेमध्वज प्रधान, योगेश वैद्य, ख्यालिजुजु मदनकृष्ण श्रेष्ठ, वरिष्ठ चित्रकार श्यामलाल श्रेष्ठ नं राजा शाक्यया उगु इलय्या भुमिकायात कया: च्वछानादीगु ख: । राजा शाक्यं नेपालभाषा कला संस्कृति साहित्य थपू यायेया नितिं थ:गु मासंगलीया छेँय् छगू कथं ज्याकू न्ह्याकादिल । थुगु हे थासय् थीथी कलाकार साहित्यकारपिं मुनेगु ज्या नं जुल । थुकियात लुमंकादिसें वय्कलं कनादी 'उगु इ जातिय विभेद दुगु इ, जिं थ:गु छेँय् नेपालभाषा साहित्य, संगीत नाप स्वापू दुपिं न्ह्याम्ह जूसां लसकुस याना: नापं नकेत्वंके याना । थुकियात जिं सामान्यरुपं कया तर जिथाय् वइपिं पासापिसं हे थ्व खँय् कुंखिना नं दिल । अथे जूसां जिं थ:गु आन्दोलनकारी भूमिकायात छेँनिसें पिनेतक गुकथं ज्यू उकथं न्ह्याका यना ।
'थुकथं २२ सालया भाषिक आन्दोलन व्यवस्थित रुपं न्ह्याकेया नितिं छयाञ्जेया जिम्मा कयादीम्ह राजा शाक्यं आन्दोलन नापनाप साहित्य सृजनाय् नं उतिक हे ध्यान नं बिया दिल । अले छम्ह सफल साहित्यकार नं जुयादिल । नेपाल संवत १०६२ तछलागा २ स केलत्वा: मासंगल्ली राजा शाक्यया जन्म जूगु ख: । वय्कलं च्वयादीगु 'मतकी', 'जि खग्रास मखु मिलाया', 'कुचा कुचागु किपा', 'ह्वगंगु सर्ग:' बाखं संग्रह पिहाँ वये धुंकूगु दु । 'जि खग्रास मखु मिलाया' सफूतिं ने.सं ११०२ या श्रेष्ठ सिरपा त्याकादीगु ख: । अथेहे 'जीवनया अ:पुगु लँपु', 'अन्धविश्वासय् छयलाबुला', 'अदालत' सफूया अनुवाद नं यानादीगु ख: । वय्कलं 'सहलह सुलचं', 'नेपालभाषा व्याकरण', 'जापानया पुला मचा बाखं', 'डाक्टरया कला', 'आशा सफू कुथि' आदि सफू व पत्रिकाय् सम्पादन नं यानादीगु ख: । वय्क: भाषा साहित्य ख्यलय् आतक नं त्यानु मचासें न्ह्यानाच्वनादीगु दु । वय्क:या ज्या नेपालभाषा ह्यमिपिनि नितिं ह:पा: बीगु या नं या:गु दु ।
News Location:
More Stories Like this
नेपालभाषा ल्यंकेगु लँय् लक्ष्मीदास मानन्धर अमर संगीत स्रष्टा राजभाइ बज्राचार्य मचाम्ह हिरोइन नस्वा: जोशी बहुप्रतिभाशाली साहित्यकार गिरिजाप्रसाद जोशी लक्ष्मण राजवंशी
