रुसय् पुटिन विरोधी क्रान्ति
रुसय् जूगु आमचुनावय् प्रधानमन्त्री भ्लादमिर पुटिनया दलं धांधली याना चुनाव त्याकुगु धइगु आरोप बिसें पुलांगु चुनावया परिणाम रद्ध याना: न्हूगु चुनाव यायेमा:गु माग तसें रुसय् त:धंगु विरोध प्रर्दशन जुयाच्वंगु दु । राजधानी मस्कों सुरु जूगु थ्व विरोध प्रर्दशन आ: देय्न्यकं ५० गू शहरय् न्यना वने धुंकुगु दु । थुगु आन्दोलनय् सोभियत संघ विघटन जुइ न्ह्य:या: वामपन्थितनिसें कया: उग्रराष्ट्रवादी, पश्चिमी देय्पाखे झुकाव दुपिं उदारतावादी नापं फुक्क धइथंे राजनीतिक विचारधाराया दलतय्सं दलतय्सं ब्वति कयाच्वंगु दु 'पुटिनया दल भिलेन व अपराधीतय् अड्डा ख:' 'आ: सत्ता हिलेगु इ वये धुकल' थेंज्या:गु व्यानर ज्वना: मनूत सतकय् कुहां वयाच्वंगु दु । रुसय् थौकन्हय् जुयाच्वंगु विरोध प्रर्दशन सोभियत संघ कुचा जुइधुंका: जूगु दकलय् त:धंगु प्रर्दशनया रुपय् का:गु दु । थ्व प्रर्दशन याना: प्रधानमन्त्री पुटिनयात तसकं मच्छिंका व्यूगु दु । रुसय् सोभियत संघ विघटन लिपा राष्ट्रपति वारिस यल्तसिनया उत्तराधिकारी कथं उदय जुम्ह भ्लादिमिर पुटिन निक्व: तक राष्ट्रपति जुइ धुंकूगु दु । रुसया संविधान कथं छम्ह हे व्यक्ति लगातार निक्व: स्वयां उप्व: कार्यकाल राष्ट्रपति जुइफइमखु ।
थुकिया हुनिं हे भ्लादिमिर पुटिनया दल चुनावय् अत्याधिक सीट त्याकूसां राष्ट्रपति जुइ मखंगु ख: । अले थ: विश्वासपात्र प्रधानमन्त्री दिमित्री मेदेेभेदेभयात राष्ट्रपति दयेका: थ: प्रधानमन्त्री जूगु ख: । सोभियत संघ विघटन लिपा रुसय् आर्थिक स्थिति भज्यंक स्यंगु ख: । रुसी रुबलया भा: अतिक क्वहां वंगु ख: । अले नये त्वनेत नापं अनया जनतायात थाकुगु ख: । थज्या:गु अवस्थाय् सत्ताय् वया: रुसयात व्यवस्थित रुपं न्ह्याका: आर्थिक, सामाजिक व मेमेगु रुपं नं सबल यायेत ता:ला:म्ह पुटिन तस्सक हे लोकंह्वा:म्ह नेता नं ख: । थुगु हे लोकपि्रयतां वयात निक्व: तक राष्ट्रपति दयेका बी धुंकुगु दु । थौकन्हय् प्रधानमन्त्री जुयाच्वंगु दु । थज्या:गु स्थितिइ जूगु चुनावय् पुटिनया पार्टीं बहुमत कायेवं रुसय् त:धंगु विरोध प्रर्दशन शुरु जूगु दु । खय्तला थुकियात कया: पुटिनं थ्व प्रर्दशनय् पश्चिमी देय्तय् ल्हा: दुगु व विशेष याना अमेरिकी विदेश मन्त्री हिलारी क्लिन्टनं उगु आन्दोलनयात उक्से यायेगु ज्या या:गु खँ नं धा:गु ख: ।
मेखे प्रर्दशनकारीतय्सं धा:सा पुटिनया सरकारं चुनावय् धाँधली या:गु नक्कली मतपत्र ह:गु आरोप लगे या:गु दु । थुगु आन्दोलनय् दकलय् सकि्रय रुपं ब्वति कयाच्वंपि इन्टरनेट प्रयोग याइपिं युवा समुदाय ख: । इमिसं सोसल नेटवर्कपाखें थुगु आन्दोलनयात अझ च्वन्ह्याका च्वंगु दु । सरकार पुलापिं वामपन्थी आन्दोलनकारीत स्वयां थुज्व:पिं न्हूपुस्ताया प्रर्दशनकारी खना: ग्या:गु दु । उकिं राष्ट्रपति दिमित्री मेदेभेदेभ तम्वयाच्वंपिं आन्दोलनकारीतय्त सम्बोधन यासे फेसबुकय् संसदीय चुनाव धाँधली जूगु खँयात कया: जाँचबुझ यायेगु खँ च्व:गु दु । मेदेभेदेभया थ्व टिप्पणीयात कया: विरोधीतय्सं उकिया लिसलय् राष्ट्रपति मेदेभेदेभ फय्गं ख: धका: लिस: च्वयाह:गु दु ।
छगू सूत्रं यानास्व:गु अध्ययन कथं १०० गू टिप्पणीमध्ये ७५ म्ह मेदेभेदेभया विरुद्धय् खनेदु मेगु २५ गु कमेन्ट चाहिं राष्ट्रपतिया पक्षय् दु । रुसय् जुयाच्वंगु थौकन्हय्या प्रर्दशनय् फेसबुक टि्वटरलगायत सोसल नेटवर्कया त:धंगु ल्हा: दुगु खँ स्पष्ट रुपं खनेदु । पुटिनयात छम्ह प्रखर नेताया रुपय् कायेगु या: । रुसयात समृद्ध रुस दयेकेगु लँय् हयेत ता:ला:म्ह नेता विरुद्ध चुनावय् धाँधली या:गु धका: सुरु जूगु थ्व आन्दोलनं लिपा छु रुप काइ व धाये थाकुनि । अथे जूसां स्वक्व: खुसि पुटिन राष्ट्रपति जुइत या:गु प्रयास थासय् लाइथें मच्वंगु खँ धा:सा स्पष्ट जूगु दु । सोभियत संघया अन्तिम राष्ट्रपति गोर्भाचोभं न थौकन्हय् जुयाच्वंगु आन्दोलनयात समर्थन यासे आमचुनाव याये मा:गु खँ धा:गु दु । सरकारया लोकपि्रयता ल्यंका तयेगु ख:सा हानं चुनाव यायेगु बांलाइ वय्कलं धयादीगु दु ।
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
