चीननापया नेपा:या स्वापू स:सा लुँ मस:सा हेंग्वा:
चिनिया प्रधानमन्त्री बेन जियाबाओ पुस ५ गतेनिसें ७ गतेतक जुइगु नेपा: भ्रमणयात थौंकन्हय् आैपचारिक व कूटनीतिक जक महत्व मब्यूसे राजनीतिक रुपं नं उतिकं महत्वपूर्ण जूगु खँ चर्चाय् वयाच्वंगु दु । नेपालय् भारत व अमेरिकाया चासो व इमिपाखें परिचालित धका: खनेदुगु गतिविधि अप्वया वंगुलिं चीनं नं नेपा:या मामलाय् उतिकं चासो कयाह:गु खँ ला थ्वयां न्ह्य: नं चर्चाय् वयाच्वंगु ख: । तर आ: स्वयम् अनया प्रधानमन्त्री नेपा: वइगु जुसेंलि थुकियात वहे चासोया आैपचारिक पुष्टिया रुपं का:गु दु । नेपालय् भारतया प्रधानमन्त्री नं थुकथं हे भ्रमणय् वयेत्यंगु दु । थुकिं नेपा:प्रति भारतीय चासो व दि्वपक्षीय सम्बन्धयात हानं न्हूधा: याना: न्ह्यायेत भारतं नं उतिकं हे नेपा:नापया सम्बन्धयात उच्च राजनीतिक तहलय् नं कायम याये चाहे जूगु खँ सी दुगु दु । न्हापा २०४६ सालया जनआन्दोलन लिपा आम चुनाव जुया: नेपालं छगू लँपु कायेत्यंगु अवस्थाय् नं भारत व चीनया प्रधानमन्त्री व राष्ट्रपतिस्तरया व्यक्तित्वतसें नेपा: भ्रमण या:गु ख: । आ: हानं नेपा: १० दँ तकया जनयुद्ध अले संविधानसभाया चुनाव लिपा ७ गू बुँदाया सम्झौता जुया: छगू स्थिरतापाखे न्ह्यायेत्यंगु दु, थुगु अवस्थाय् नेपा: हानं छुं न छुं रुपय् उदीयमान देय्या रुपय् खनेदुगु दु ।
थथे जूगुलिं नं चीन व भारतं उच्च राजनीतिक स्तरय् हे नेपा: लिसेया सम्बन्धयात न्हूधा: यायेत स्व:गु ख: धका: धायेफु । थ्व स्थितिइ नेपालं छु यायेगु ? थ्व नीति आ: नेपालं तयार यायेमा:गु जुयाच्वंगु दु । न्हापा पञ्चायती कालय् भारतया ख्याच्व: क्यना: नेपालं चीनपाखें लव: कायेगु व चीनया ख्याच्व: क्यना: भारतपाखें लव: कायेगु ज्या यात । थुकथंया नीतियात थौंकन्हय् विरोध याइपिं नं दु । थ्व खँ चीन व भारत निथी नं नं सी धुंकूगु जूगुलिं निथी नं नं पत्या याइमखु धइपिं नं दु । हानं नेपालय् दुने भारतीय लबि व चिनिया लबिया मनूत दयावये धुंकूगुलिं थुमिसं थुज्व:गु नीतिया विरोध याइगु जु हे जुल । तर पञ्चायतकालय् नं नेपाल भारतप्रति हे आश्रित देय् ख: ।
चीननापया मित्रता भारतया नितिं ख्याच्व: पक्का नं ख: । थुकिं भारतनाप शक्ति सन्तुलनय् थ:गु अडान कायेगु नितिं जक नेपालं चीननाप मित्रताया ल्हा: क्वातुकूगु ख: धका: धायेगु हे पाय्छिगु खँ जू वनी । उबलय् थुकथं हे याना: उत्तरी चेकपोष्टय् च्वंपिं भारतीय सेनायात चीकेत नेपा: सफल जुल । तर राष्ट्रवादी धा:म्ह जुजु महेन्द्रं हे सन् १९६५ स भारतनाप गोप्य सम्झौता या:गु खँ नं पिहाँ वयाच्वंगु दु ।
मेखे चीनं नेपालय् चासो तयाच्वंगु धइगु 'फ्री तिब्बत'या गतिविधि जुइके बी मज्यू धका: ख: । गुगुं इलय् चीन विरुद्ध सशस्त्र कारवाही याना: उधुम मचे यायेत स्व:पिं खम्पातय्त नेपालं नियन्त्रण यात । आ: उकथं मखुसां फ्रि तिब्बतया पक्षय् आपालं गतिविधि जुयाच्वंगु दु । अझ तिब्बती शरणार्थीपिन्त परिचय पत्र बी माल धइगु स: नं पिदनाच्वंगु दु । हालय् तिब्बती शरणार्थीयात नेपाली दयेका: अमेरिकी सिफारिश नाप बिया छ्व:गु गोप्य चिठ्ठीया भेद नं पिहाँ वल । चिनिया प्रतिनिधि मण्डलया विरोधय् प्रदर्शन यायेत स्व:पिं तिब्बती शरणार्थीतय्त नेपा:या पुलिसं नियन्त्रण नं यायेमाल । अले तिब्बती शरणार्थीपिन्त नियन्त्रण याइगु, दमन याइगु नेपा: सरकारयात अमेरिकां ग्वाहालि बी मज्यू धका: छम्ह अमेरिकी सिनेटरं नं न्ववात ।
थुकथं नेपालय् भारतीय व अमेरिकाया अप्व:गु प्रभावं हे चीन विरोधी गतिविधि अप्व:गु खनेदुगुलिं चीनं नं नेपालय् थ:गु प्रभाव अप्वयेकेत कुत: यानाच्वंगु सी दु । अथे जूगुलिं नेपालं आ: चीननापया थ:गु स्वापू बल्लाका: फयांफच्छि आपा: सहयोग दुकायेगु यायेमा: । सरकारी स्तरय् विकास आयोजनाय् सहयोग, निजी स्तरय् नेपालय् चिनिया लगानीया प्रवर्द्धन व जनस्तरय् चिनिया पर्यटकत दुकायेगु ज्याया नितिं कुत: जुइमा:गु खनेदु । धात्थें धायेमाल धा:सा थुकथं जक न्ह्या: वनेफत धा:सा चीनपाखें नेपालं आपालं हे फाइदा कायेफइ ।
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
