शहर व्यवस्थित यायेत बांला:गु पला:
लँ तब्या यायेगु ज्यास्वनिगलय् दुने व अझ विशेष याना: येँ शहर दुने यातायातया चाप उतिकं अप्वयावंगु ला सकसिनं खना हे च्वंगु दु । थुगु स्थितिइ लँ तब्या यायेगु ज्या थनया यातायात चापयात व्यवस्थित यायेगु जक मखु, शहरया सौन्दर्य उप्वयेकेगु नितिं नं उतिकं हे ग्वाहालि जू वनीगु खँ ख: । थ्वहे झ्वलय् बानेश्वरय् होटेल एभरेष्टय् लँपु तब्या: यायेत महानगरपालिकापाखें या:गु कुत: यात च्वछायेमा: । थ्वयां न्ह्य: थ्वहे महानगरपालिकापाखें कलंकीइ जुयाच्वंगु अतिक्रमणयात चीका: न्ह्यच्यूगु खँय् नं सकसिनं च्वछा:गु हे ख: । आ: स्वनिगलय् दुने यातायात व्यवस्थापनया नितिं कलंकी, ग्वंग:बुँया न्हूगु बसपार्कलिसेया थासय् ओभरहेड क्रसिङ बि्रज नं दयेकाच्वंगु दु । तर क्रसिङ बि्रज दयेकेगु नामय् टन्न पस: कव: पिकया: अझ भीड अप्वयेकेगु ज्यायात धा:सा झीसं विरोध हे यायेमा: ।
आ: बानेश्वर लागाय् लँपु तब्या यायेगु ज्यायात सर्वोच्चया आदेशं हे पनेगु ज्या नं जुल धइगु न्यनेदु, गुगु झीगु नितिं दु:खया खँ ख: । सर्वसाधारण जनताया चासो छु ले धायेबलय् थुकथंया ज्या निरन्तर रुपं छगू अभियानया रुपय् हे न्ह्याये माल । अले छक्व: झारा टारे याना: क्यनेत ज्या यायेगु मखु, शहरय् दुने गुगु नं कथं अतिक्रमण जुइके मबीत नीति हे तयार जुइमाल । थ्व जनताया धापू ख: । थुकथं यायेबलय् प्रत्यक्ष रुपं खनेदुगु चक्रपथया ज:ख: ग्रीनबेल्टया नितिं छुटे यानात:गु जग्गा अतिक्रमण जुयाच्वंगु व नापनापं न्ह्य:ने ला:थे लँपु पिकायेगु ज्या नं बन्द यायेमा:गु दु । थुकिया नितिं येँ महानगरपालिकापाखें अभियान हे सञ्चालन यायेमा:गु जरुरी खनेदु ।
चक्रपथ जक मखु, थनया खुसि सिथय् नं उतिकं हे अतिक्रमण जुयाच्वंगु दु । विशेष याना: टेकुंनिसें थापाथली जुया: शंखमूलतक बागमती अतिक्रमणय् लानाच्वंगु झीसं खनाच्वनागु दु धा:सा मेखे मनोहराया ज:ख: नं उतिकं हे अतिक्रमण झीसं खनाच्वनागु हे दु । थुकी विशेष याना: पिनें व:पिं गरिब जनता हे अप्व: अव्यवस्थित रुपं बसोबास यानाच्वंगु दु । थुज्व:गु अव्यवस्थित व फोहर बस्ती अले आम्दानीया नितिं खा, हेँय्, फा लहीगु ज्यां याना: अन हे बर्डफ्लू नं खनेदत । नेपालं थ:त बर्डफ्लू मुक्त देय् धका: घोषणा या:गु नापं हावा नल । उकिं थुकथं अव्यवस्थित बसोबासयात नं चीका हे छ्वयेमा: । मानवीय रुपं छुं वैकल्पिक व्यवस्था यायेमा:सा उज्व:गुकथंया अव्यवस्थित बसोबासयात प्रोत्साहन बीमज्यू ।
मेगु खँ थनया सार्वजनिक जग्गा नं उतिकं हे अतिक्रमण जुयाच्वंगु दु । हालय् अख्तियार दुरुपयोग अनुसन्धान आयोगं सरकारयात क्लव संघ संस्थायात न्ह्य:ने ला:थे जग्गा इने मज्यू धका: ब्यूगु निदर्ेशन नं लसकुस यायेबह:गु खँ ख: ।
News Location:
More Stories Like this
समाजसेवी दिलशोभापाखें सुभाय् देछा जय श्री संगीत समाजया ज्व:मदुगु ज्याझ्व: पुलांगु येँ शहर विकासया नितिं जागरण अभियान जागरणया न्हापांगु अधिवेशन वेश्यायात बेकमया मुद्दा
