संघीयताया नामय् संघीयता
नेपालय् संघीयता छु यायेत माल ? उत्पीडित जाति व जनजातिपिन्त थ:गु अधिकार बीगु नितिं माल । थ:थ:गु भूमिइ थ:थ:पिसं शासन–प्रशासन न्ह्याकेगु अधिकारया नितिं माल । थ:थ:गु जातीय अस्तित्वया पहिचानया नितिं माल ।
थथे मजुइगु ख:सा नेपाल थुज्व:गु चीकूगु देशयात मुक्कं हे छगू प्रदेश धका: माने या:सां छुं पाइमखु, भारतयात जक स्वयेगु ख:सा झीगु सिकं तत:धंगु भौगोलिक क्ष्ोत्र छगू प्रदेश जुयाच्वंगु दु धा:सा थन प्रदेश विभाजन याना: संघीयताय् वनेमा:गु छुं जरुरत मदु । खाली छम्ह पुलिसया हाकिमं गुलि एरिया कभर यायेफइगु ख:, उकियात स्वया: इलाका व जिल्ला जक दयेकूसा कुगाइ । थ्व खँ थुगु हुनिं न्ह्य:ने हयेमा:गु ख: कि नेपालय् पञ्चायती शैलीइ अञ्चल विभाजन या: थें उत्तर दक्षिण स्वका: प्रदेश विभाजन यायेगु खँ पिहाँ व:गु दु । अझ पञ्चायतीकालय् वीरेन्द्रं विभाजन या:गु न्यागरु विकास क्ष्ोत्रयात हे प्रदेश दयेकेगु धका: तकया खँ स्वयम् राज्य पुनर्संरचना आयोगय् च्वंपिसं पिथनाच्वंगु दु । थ्व दकलय् दु:खद् खँ ख: ।
वास्तवय् संघीयताया सवाल हे मधिसे जनतां आन्दोलन याये धुंका: व:गु ख: । झीसं नं झीगु लागाय् नेवा: स्वायत्त राज्य दयेमाल धका: माग यानावयाच्वनागु ख: । यदि आन्दोलनरत जाति–जनजातिया जनताया माग हे सम्बोधन मजुइगु ख:सा संघीयताय् वनेगुया छुं अर्थ मदु । संघीयताय् वनेगुया अर्थ ख:, थनया उत्पीडित जाति–जनजातिया पहिचानयात स्वीकार यायेगु, शासन–प्रशासनय् इमिगु पहुँच सुनिश्चित यायेगु ख: ।
नेपालय् थौंतक एकात्मक व्यवस्था कायम जुयावयाच्वंगुलिं विकासया ज्या जुइमफुगु ख: धइगु खँ स्वीकार जुइ धुंका: नं संघीयताया नामय् संघीयता जक लागु याना: थन पुलांगु एकात्मकता यात हे बरकरार हे तयातयेगु षडयन्त्र जुयाच्वंगु दु । राज्य पुनर्संरचना आयोग छु यायेत गठन जूगु धका: दक्वसिनं स्यू । थ्व संविधानसभाया राज्य पुनर्संरचना व राज्य शक्तिया बाँडफाँड समितिपाखें प्रस्ताव या:गु १४ गू प्रदेशया प्रस्तावयात फाता पुइकेत या:गु षडयन्त्रया छगू अंग ख: । तर थुकियात नाकाम यायेगु ज्या संघीयता व जातीय स्वायत्त राज्यया पक्षधर मनूतय्गु जूगु दु । अन दुने जातीय पहिचान सहितया स्वायत्त राज्यया पक्षधरतय्त अल्पमतय् लाका: सिधयेकेगु गुगु षडयन्त्र जुयाच्वंगु दु, उकियात बेकार दयेकगु हे आ: झीगु कार्यभार खनेदुगु दु । थुकिया नितिं आ: लिम्बुवानतसें राज्य पुनर्संरचना आयोगय् थ:पिनिगु नं प्रतिनिधित्व दयेमा: धका: गुगु धयाच्वंगु दु व पाय्छि ख: व उकियात झीसं नं समर्थन नं यायेमा: । छुं गथे जुया: थुगु राज्य पुनर्संरचना आयोगं जनताया मागयात सही ढंगं समाधान याये मफत धायेवं जाति–जनजातितसें न्ह्याकावयाच्वंगु आन्दोलन भड्के जुइगु निश्चित खनेदु । थुकथं जुल धा:सा जनजाति जनतां थ:थ:गु भागय् थ:थ:गु स्वायत्त राज्यया सीमाबन्दी याना: उकिया अभ्यास याइगु व समानान्तर शासन प्रशासन न्ह्याकीगु उतिकं खतरा दु । थथे जुल धायेवं देसय् स्थिति स्यना: विकासया गति झन् हे ल्यूने ला: वनी व थुकिया जिम्मेवार देशया सञ्चालकतसें कायेमाली ।
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
