चीनया प्रधानमन्त्रीया भ्रमण स्थगितं दंगु न्ह्‍यस:

चीनया प्रधानमन्त्री बेन जिया बाओ पुस ५ निसें ७ तक नेपाल भ्रमणय् वइगु ज्याझ्व: आकाझाकां स्थगित जूगु खँ त:धंगु चर्चा व च्यूता:या विषय बने जूगु दु । थुगु भ्रमण दल आतक नेपालय् वयेत्यंगु चीनया दकलय् त:धंगु भ्रमण दल जुइगु खँ पिहाँ वइच्वंगु ख: धा:सा थुगु भ्रमणया झ्वलय् नेपा: व चीनया दथुइ महत्वपूर्ण सन्धि सम्झौताय् नं ल्हा:चिं तयेगु ज्या जुइगु खँ पिहाँ व:गु ख: । थुथाय् लाक्क आकाझाकां चीनया प्रधानमन्त्री नेपा: भ्रमणय् मवइगु खँ पिहाँ वयेवं थन त:धंगु हलचल जूगु दु । खय्‍तला थुगु भ्रमण स्थगित जूगु हुनिं चीनया हे आन्तरिक मामिला धका: धा:गु दु । अथे जूसां छु मामलां धका: धा:सा स्पष्ट या:गु मदु । थुकियात कया: अनेतने शंका–उपशंका नं ब्वलंगु दु । चीनं नेपा:यात गनं विश्वास जकं मया:गु ख: ला कि ? न्ह्‍यस:चिं दंव:गु दु । विशेष याना: माओवादी व मधेशवादी दलतय् मोर्चा मधेशी मोर्चाया सरकारय् जकं छुं कथंया कचवं पिहाँ व:गु जकं ख: ला कि थुकिं नं न्ह्‍यस: चिं दंव:गु खनेदु । नेपा: व चीन दथुइ परापूर्वकालंनिसेंया सम्बन्ध पञ्चायत शासनया इलय् तसकं बांलानावंगु ख: । नेपालय् व:गु भूमि सुधारनापं मेमेगु महत्वपूर्ण खँत नापं चीनपाखें प्रभावित जुया: व:गु ख: धायेगु या: । अथे हे उगु कालय् चीनं नेपा:या विविध ख्यलय् ग्वाहालि या:गु ख: । लाकां कारखाना निसें काप: कारखानातक, अप्पांनिसें सिमेन्ट कारखानातक दयेका: आैद्योगिक क्रान्तिया नितिं जग स्वनेत ग्वाहालि या:गु ख: । अथेहे नेपा:या राजमार्गंनिसें कया: थीथी महतवपूर्ण लँ दयेकेगु ज्याय् नं ग्वाहालि या:गु ख: । राष्टि्रय सभागृह, थौंकन्हय्‍या संविधानसभा भवन वीरेन्द्र अन्तर्राष्टि्रय सम्मेलन केन्द्रतकं चीन सरकारया ग्वाहालिं दयेकेज्या जूगु ख: । थुकथं चीनं नेपा:या विकास निर्माण खँय् ग्वाहालि याना वयाच्वंगु ख: धा:सा नेपालं चीनया एक चीन नीतियात सदां समर्थन यानाव:गु ख: । आ: जुइ धका: तयार यानात:गु चीनया प्रधानमन्त्रीया भ्रमण लिपा चीनं नेपा:या विकासया नितिं यक्व ग्वाहालि याये फइगु खँय् आशा कयात:गु ख: ।
विश्वय् शक्तिशाली अर्थतन्त्र विकास जुयावनाच्वंगु देय्‍या रुपय् म्हसीका बीत ता:लाये धुंकूगु चीनं नेपा: नापया स्वापूयात तसकं महत्व ब्यू धका: प्रमाणित याइगु थुगु भ्रमण स्थगित जूगु कारणं नेपा:मिपिन्त यक्व घाटा जूवनीगु खनेदु । मेखे थज्या:गु महत्वपूर्ण भ्रमण स्थगित जुइगु धइगु नेपा:या प्रतिष्ठाय् नं कमी वइगु ख: । थुकियात नं वा:चायेके मा: ।

News Location:

More Stories Like this

पहिचानसहितया संघियताय् नेतातय्गु ग्याचिकु
दरवार हत्याकाण्डय् ‘रअ’ मखु ‘सिआईए’ नाय: हँ
कोइराला सरकार न ख्येँय् चाल न हँय्या चाल
निर्वाचनया निष्पक्षताय् ब्वलंगु न्ह्‍यस:
अधिवेशनं ब्यूगु सन्देश