नेवा: एकता दिवस व नेवा: शक्ति
य:मरि पुन्हि खुन्हु ज्यापु दिवस, पाहाँच:र्हे बलय् नाय: दिवस धका: नेवा: दुनेया समुदायपिसं दिवस हनेगु ज्या यानाच्वंगुली नेवा:तय्गु हे संस्कृति व जातीयता जक मखु, जातीयता दुनेया विविधता नं ब्वयेगु ज्या जुयाच्वंगु दु । नेवा: दुनेया थीथी जात व थरया मनूतसें थ:थ:गु उन्नति प्रगति व भिंनीया नितिं संगठित जुया: ज्या यानाच्वंगु दु । थुकथंया जात–थरया संगठन हानं नेवा: देय् दबूया कुसा क्वय् संगठित नं जुयाच्वंगु दु । थ्व घिसिपिटी परम्पराय् तक्यनाच्वनेगु त्व:ता: उन्नति प्रगति याना: न्ह्या: वनेगु धार ख: । तर थुकी 'छलाङ्ग' मारे यायेगु धार मदुनि । तत:धंगु पंग:त वल धायेवं छलांग मारे यायेगु आन्दोलन व क्रान्तिकारीताया धार नं झीत मा: । ह्यूपा: व परिवर्तनया धार नं झीत मा: । थुकिया संवाहकया रुपय् झीसं नेवा: एकता दिवस हनेत्यनागु दु । थ्व चेतनाय् घ्वायेगु ज्या धा:सा झीत नेवा: स्वायत्त राज्यया आन्दोलनं या:गु ख: ।
ने.सं. ११३० पोहेलागा: ९ खुन्हु एेतिहासिक रुपं येँया रंगशालाय् भव्य जनसागरया दथुइ क्वचाल । थ्व एेतिहासिक ज्याझ्वलं नेवा: शक्तिया गुगु प्रदर्शन जूवन, थुकिं नेवा:तय्त हेपाह दृष्टिकोण स्वइपिनि दृष्टिकोणय् तकं ह्यूपा: वल । थुकथं जूगु नेवा: शक्ति प्रदर्शनयात जीवन्त यानातयेत नेवा:तसें नेवा: एकता दिवस हनेगु परम्परा थगुनेनिसें सुरु जूगु ख: । नेवा: एकताया अर्थ नेवा: दुने दयाच्वंगु थीथी जातया दथुइया एकता हे ख: । सकसिनं थ:त नेवा: हे धयावयाच्वंगु दु, तर नेवा: दुने थजात–क्वजात धायेगु व थ:थ:हे त:धं धका: जुइगु गुगु इलय् सत्ताधारीतसें छुनाथकूगु मानसिकतां झीपिं ग्रस्त जुयाच्वंगु दु । थ्व जक मखु, झीथाय् गां व देय् दथुइया विभाजन नं दु, अले गां–गां व देय् देय् दथुइया विभेद नं दु । थुलि जक मखु, दलगत राजनीतिया विभाजनं नं नेवा:तय्त उतिकं ग्रस्त यानात:गु दु ।
नेवा: स्वायत्त राज्यया आन्दोलन सुरु जुइधुंका: आ: थुकथंया विभेद व विभाजनया प:खा: क्व:ददं वनाच्वंगु दु । खतुं नेवा: एकता दिवस धका: घोषित रुपं थगुने फुक्क जातया मनूतसें थ:पिनि दथुइया गुगुंकथं विभेद मदुगु घोषणा यात । घोषितरुपं थुकथं जातजातया विभेदया अन्त जूगु धा:सां नेवा: स्वायत्त राज्यया नितिं जुयाच्वंगु आन्दोलन, नेवा: स्वायत्त राज्यया घोषणा सभा व नेवा: एकता दिवस सकतां ज्याझ्वलय् दलया भेद त्व:ता: नेवा:त कुहाँव:गु दु । अले रंगशालां पूच्वय् वना: देय्देय् दथुइया विभेदया नं अन्त यायेगु कुत: जूगु दु । वास्तवय् नेवा: एकता दिवस हनेगुया अर्थ थुकथंया विभेदयात ब्वयेत जक मखु, झीगु मानसिकतां नं हुया छ्वयेमा:गु दु । थुकिया नितिं दिवस हनेगु ज्या छगू अभ्यास नं ख: ।
News Location:
More Stories Like this
समाजसेवी दिलशोभापाखें सुभाय् देछा जय श्री संगीत समाजया ज्व:मदुगु ज्याझ्व: पुलांगु येँ शहर विकासया नितिं जागरण अभियान जागरणया न्हापांगु अधिवेशन वेश्यायात बेकमया मुद्दा
