सरकार क्व:थलेगु कासा न्ह्यात, चिनिया प्रमया नेपा: भ्रमण स्थगित
डा. बाबुराम भट्टराइया नेतृत्वय् च्वंगु गठबन्धन सरकारया मेगु घटक मधेशी मोर्चां सरकार गठनया इलय् जूगु प्यंगू बुँदाया सम्झौताय् दुथ्या:गु झिद्व: मधेसी युवातय्त सेनाय् दुथ्याकेगु खँयात आकाझाकां ल्ह्वंगु दु । यदि थ्व बुँदाय् न्ह्यथनात:कथं तत्काल प्रकि्रया सुरु मजुल धा:सा गठबन्धन तोडे जुइफु धका: ख्याच्व: ब्यूगु दु । थुगु सम्झौताया ला सकसिनं हे विरोध याना हे च्वंगु ख: । उकी नं दकलय् विरोध धइगु हे मधेशीतय्त सेनाय् दुथ्याकेगु खँया विरोध जूगु ख: । तर सरकार गठन जूगु भदौनिसें ३ लात्या इतक थ्व खँ कार्यान्वयन यायेगु नितिं मधेशीतसें खँ मल्ह्वं, तर आकाझाकां हे ध्याक्क हे मिंक खँ पिथना: ख्याच्व: नापं बिल । थ्व खँ स्वयेवं हे आ: सरकार क्व:थलेगु कासा न्ह्यात धका: अ:पुक हे अनुमान यायेफु । माओवादी, कांग्रेस, एमाले व मधेशी मोर्चाया दथुइ वंगु कार्तिक १५ गते जूगु ७ गू बुँदाया सम्झौता लिपा थुगु सरकारं थुकिं हे राष्टि्रय सहमतिया सरकारया रुप काइ धका: नं दावी या:गु ख: । तत्काल थुकिया काउण्टर सुनां नं मया: । वयां छुं र्इ लिपा हे राष्टि्रय सहमतिया सरकार सहमतिया आधारय् हे गठन जुइगु धाल । वयां ल्यू हे स्वला प्यला तक धइथें सुम्क च्वनाच्वंम्ह एमाले नेता खड्ग ओलीं न्ववात – थुगु सरकार राष्टि्रय सहमतिया सरकार जुइफइमखु । अनंलि माधव नेपालं नं थुकी हे तुं झ्व: छू वल ।
हानं राष्टि्रय सहमतिया सरकारय् नेतृत्व यायेगु नितिं शेरबहादुर देउवा न्ह्यचिल । तर पार्टीया संस्थापन पक्षं थ:त ग्वाहालि मयाइगु खना: न्हापा सहमतिया सरकार गठन जूसा थ:त उम्मेदवार दयेकेगु धइगु निर्णय उल्टे यायेत हाथ्या बिल । थुकथं सरकार हिलेगु खेल सुरु जूगु धइगु संकेत ला खनेदत, तर थुगु सरकार गुकथं क्व:दलीगु ख: धका: न्ह्यपुइ खँ चा:हुलाच्वंगु इलय् हे मधेशी मोर्चां गुगु त्वह: पिकाल, उकिं सरकारयात क्व:थलेगु नितिं कसरत नं सुरु जूगु संकेत खनेदत ।
मेखे सरकारय् च्वंपिसं धा:सा मधेशी मोर्चाया माग पूरा यायेगु नितिं प्रधानमन्त्री सकारात्मक हे जूगु खँ धयाच्वंगु दु । समस्या गुकथं पिदन, उकथं सरकारं समाधान याना: न्ह्याये फइगु गुगुं स्थिति खनेमदु, थ्व सरकार क्व:थलेगु हे खेल कथं खनेदु । तर थुकी दुने सरकारयात अझ नं क्व:छुका: ज्या कायेगु षडयन्त्र नं थुकी सुलाच्वंगु जुइफु । विशेष याना: थुगु सरकारं चीननाप थ:गु स्वापू क्वातुकेगु नितिं चिनियाँ प्रधानमन्त्री बेन झियाबाओ नेपाल वइगु खँयात भारत व अमेरिकां ययेकाच्वंगु मदु । डा. बाबुराम भट्टराइया नेतृतवय् च्वंगु थुगु सरकारं चीननाप स्वापू क्वातुकेत स्व:गुयात क्व:थलेत व थ:गु हे लीकय् न्ह्याकातयेत नं थुगु षडयन्त्र जूगु खयेफु । धात्थें हे चिनिया प्रधानमन्त्री बेन झियाबाओया भ्रमण नं स्थगित जूगु सुचं वल । भ्रमणया सम्बन्धय् चिनिया पक्षं आैपचारिक रुपं घोषणा मया:गु ख:सां कुटनीतिक रुपं एजेण्डा तकं तयार याये धुंकूगु खँ सीदुगु दु । चीनय् विशेषकथंया छुं घटना मजुइकं हे थुकथं आकाझाकां भ्रमण स्थगित जूगुलिं नं डा. बाबुराम भट्टराइया सरकारयात बांमलाक्क धक्का ला:गु दु । थुकियात डा. बाबुराम भट्टराइया कूटनीतिक असफलताया रुपय् नं मनूतसें का:गु दु । खतुं नेपा: थुज्व:गु देसय् उकिसनं अनेकतनेक राजनीतिक खेलाडीतसें देय् दुने म्हितीगु व देय् पिनेया खेलाडीतय्गु नं त:धंगु प्रभावं ज्या याइगु नेपालय् प्रधानमन्त्री छम्हेसिया सफलता वा असफलताया सवाल ल्ह्वनीगु खँ मखु, थन ला छु खेल गनं सुनां यानाच्वन धका: जक स्वयेमा:गु खनेदु ।
डा. बाबुराम भट्टराइया नेतृत्वय् सरकार गठन जुइधुंका: वंगु कार्तिक १५ या न्हय्गू बुँदाया सम्झौता, माओवादी लडाकूतय्गु पुनर्वर्गीकरणया ज्या जूगु, कब्जा जमीन लित बीगु प्रकि्रया न्ह्याकूगु व राज्य पुनर्संरचना आयोग दयेकेगु ज्या जुइधुंकूगुलिं आ: थुकियापाखें माओवादी लिहाँ वने फइगु स्थिति मदु । माओवादीं कायेमा:गु थासय् काये धुंकूगु दु, लायेमा:गु थासय् लाये नं धुंकूगु दु । अथे जूगुलिं माओवादीयात सरकारय् तयेगु उपादेयता नं सिधये धुंकूगु दु । अथेजूगुलिं थुगु सरकारयात क्व:थलेगु अभ्यास सुरु जूगु ख:सां अजू चायेमा:गु मदु ।
News Location:
More Stories Like this
समाजसेवी दिलशोभापाखें सुभाय् देछा जय श्री संगीत समाजया ज्व:मदुगु ज्याझ्व: पुलांगु येँ शहर विकासया नितिं जागरण अभियान जागरणया न्हापांगु अधिवेशन वेश्यायात बेकमया मुद्दा
