राज्य पुनर्संरचनापाखे कांग्रेसया पहल

सम्पादकीय
राज्य पुनर्संरचना व शासकीय प्रणाली छु यायेगु धइगु खँय् निर्णय याये मफयाः संविधान च्वज्या हे प्रभावित जुयाच्वंगु इलय् लाक्क नेपाली कांग्रेसं थ्व निगू विषयय् पार्टीया अवधारणा तयार यायेत पहल सुरु याःगु दु। देशय् दक्व दलतय्सं राज्य पुनर्संरचनाया पूर्ण खाका हे तयार यानाः बुझे याना तयेधुंकूगु अवस्थाय् नं कांग्रेसं आः तक थुकिया बारे थःगु बिचाः तकं बी मफुगु विडम्बनाया खँ धायेमाः। संविधानसभाया राज्य पुनर्संरचना समितिं जातीय व क्षेत्रीय रुपं विभाजन याना तःगु १४ गू प्रदेशया प्रस्ताव पारित याना तयेधुंकूगु दु। तर कांग्रेसं उकियात स्वीकार धाःसा याःगु मदुनि। कांग्रेसं तयारी प्रस्तावयात स्वीकार मयायेगु व थःगु प्रस्ताव नं मबीगु ज्या यानाच्वंगु कारणं राज्य पुनर्संरचनाया ज्यायात अनावश्यक रुपं जटिल दयेकेगु कुतः जुयाच्वंगु दु।
तर लिबाक हे जूसां कांग्रेसं राज्य पुनर्संरचना बारे अवधारणा दयेकेगु ज्या न्ह्याकूगु दु, उकियात लसकुस यायेमाः। राज्य पुनर्संरचना बारे देसय् व स्वयम् कांग्रेस दुने छु गुगु कथंया बिचाः वयाच्वंगु दु धइगु खँ उकुन्हु राज्य पुनर्संरचना आयोग दयेकेगु लाकि समिति दयेकेगु धइगु खँय् पार्टी व जनजाति ककस दथुइ ब्वलंगु तनावपाखें सीका हे काल जुइमाः। कांग्रेसं आः थःगु अवधारणा दयेकीबलय् थ्व भावनायात नं आत्मसात याइ धकाः आशा कायेफु। राज्य पुनर्संरचना कांग्रेसया एजेण्डा मखु। अथे खःसां राज्य पुनर्संरचना यायेत कांग्रेसया मत निर्णायक खः। राज्य पुनर्संरचनाया प्रशंग थौं गुगु मोडय् थ्यनाच्वन धइगु खँ कांग्रेस नेतातय्सं मसिउगु मखु। थ्व यथार्थयात कांग्रेस नेतातय्सं मखंछु यायेगु घातक जुइफु।

More Stories Like this