न्ह्यइपुसे च्वंगु म्येँया मुना छंगु मिखाय्

श्याम उदय
नेपालभाषा म्येँ ख्यलय् थौंकन्हय् चर्चाय् वयाच्वंम्ह भाजु खः जीवनलाल मास्के। वय्कः छम्ह संगीतकार जक मखु गायक व म्येँ च्वमिं नं खः। अझ वय्कःया खुबीया खँ ल्हायेगु खःसा न्हून्हूपिं सर्जकत छथाय् मुंकाः न्हूगु छुं सिर्जना यानाः पिथनेगु खः। थ्वहे झ्वलय् न्हूदँया लसताय् पिहांवःगु 'छंगू मिखाय्' आः बजारय् दु। थ्व वय्कःया पिथना कथं मीरा, जेश्मि, मतिना व ओशन मास्केया च्यागूगु श्रृंखला खः।
'छंगु मिखाय्' सिडीइ नं न्हून्हूपिं कलाकारत जुजु बज्राचार्य, रत्नशोभा महर्जन, दिपा महर्जन व स्वस्ति महर्जनपिनिगु लगनशीलतायात कदर यानाः थाय् बियातःगु दु। इमिगु प्रतिभायात बांलाक वालाः ब्वयातःगु दु। मय्जु ललिता मानन्धर 'छंगु मिखाय्' या निंतिं थां हे खः। छंगु मिखाय् नेवाः म्ये मुनाया मुक्कं संगीतं जीवनलालजुया हे खः। अथे नं थुकी वय्कःया म्येँ व सः नं दु।
थुकी रजनी मिला, जुजु बज्राचार्य, दर्शनवीर शाक्य, सुशील राजोपाध्याय् व जितेन्द्र महर्जन 'तरी' पिनिगु रचना नं दुथ्यानाच्वंगु दु। म्येँत न्ह्यइपुगु मुडय् दु। संगीत सलल्ल वंसा म्येँ हालामिपिनिगु सः नं यइपुसे च्वं। अथे खयां नं 'यक्व यक्व खं' छपु नुगः मछिंकाः हालातःगु दुसा बोनस म्येँ कथं फेमिलि म्येँ धकाः अंग्रजी म्येँ छपु नं दुथ्याकातःगु दु। अथे हे 'जि दयेक दयेकं' धाःगु म्येँ त्यपू जीवनय् मेम्ह (लिथु) हयेगु खँय् हालतःगु म्येँ नं न्ह्यइपुसे च्वं। समग्रय् थ्व सिडीइ दुथ्याःगु म्येँ फुक्कं रोमान्टिक मुडय् दु।
न्हूदँ ने.सं. ११३२ स पिहां वःगु 'छंगु मिखाय्' थें भाजु जीवनलाल मास्केपाखे अझ नं थथे हे ग्यसुग्यंगु म्येँ मुना पिहां वइगु भलसा काये।

More Stories Like this