दान याःगु निगलं मिखाया सफल प्रत्यारोपण

ख्वप(सन्ध्या टाइम्स)/नगदेश बौद्ध समूहया उपाध्यक्ष उपासक दीपकराज साँपालया मां उपासिका रामकुमारी साँपाल वंगु मंसिर २० गते ९३ दँया वैशय् मंत। वय्कः उपासिका नगदेश बुद्ध विहारयाम्ह जक मखुसें नगदेशया हे जिथिम्ह उपासिका खः। वय्कः मदये धुंकाः वय्कःया छेँजःया उजं कथं तिलगंगा आँखा प्रतिष्ठानय् शंखनारायण त्वाय्नाया ग्वाहालिइ वय्कःया मिखा दान यायेगु ज्या जुल। मिखा दान याःगु कन्हय् कुन्हु वय्कःया छगः मिखा भारतया विहार राज्य निवासी साह थरया ३४ दँ दुम्ह मिजंयात प्रत्यारोपण जूगु खःसा मेगु मिखा चितवन निवासी मैनाली थरया ३८ दँयाम्ह छम्ह मिसायात प्रत्यारोपण याःगु खः। लसताया खँ, उपासिका मय्जु रामकुमारी साँपालया निगलं मिखाया सफल प्रत्यारोपण जूगु दु।
थःगु मृत्यु धुंकाः नं धर्मया लँ मत्वःतूम्ह उपासिका रामकुमारी साँपालया सद्गति व निर्वाण कामनायासें नगदेश बौद्ध समूहं वंगु शनिवाः बिचाः हायेका ज्याझ्वः नं याःगु खः।