झिंच्यादँ दुपिंत मतदाता यायेगु सहमति

येँ(सन्ध्या टाइम्स)/न्हूगु संविधान निर्माणया निंतिं विवाद जुयाच्वंगु विषय समाधानया निंतिं दयेका तःगु संविधानसभाया संवैधानिक समिति अन्तर्गतया उपसमितियागु थौं सुथय् च्वंगु बैठकं मतदाता जुइपिनि उमेर सम्बन्धी विवाद अन्त्य याःगु दु।
चुनावय् १८ दँ दुपिं नागरिकतय्सं आम निर्वाचनय् मतदान याकेगु खँय् सहमति जूगु दु। थौं सहमति जुइ न्ह्यः दलतय् दथुइ मतदानया नितिं उमेर १६ तयेगु ला कि १८ दँ तयेगु धइगु खँय् मतभेद जुयाच्वंगु खः।
लिसें बैठकं निर्वाचन प्रणाली बारे नं सहमति कायम याःगु दु। चुनाव प्रणालीया सवालय् मिश्रित निर्वाचन प्रणालीयात स्वीकार यायेगु सहमति उपसमितिं याःगु खः। प्रत्यक्ष व समानुपातिक निगुलिं प्रणालीयात नालाः चुनाव यायेगु सहमति बैठकय् जूगु खः। प्रत्यक्ष व समानुपातिकया नितिं गुलि गुलि प्रतिशतया व्यवस्था यायेगु धइगु खँय् सहमति याये धाःसा ल्यं दनि। ६०/४० प्रतिशत तयेगु लाकि ५०/५० प्रतिशत तयेगु धइगु विषयय् अझ नं छलफल जारी हे दनिगु खँ नेपाली कांग्रेसया नेता रामचन्द्र पौडेलं कनादीगु दु।