पार्टी तज्याःगु घोषणा याये जक ल्यं दनि: गजुरेल
येँ(सन्ध्या टाइम्स)/एकीकृत माओवादीया सचिव सीपी गजुरेलं पार्टी तज्यात धकाः औपचारिक रुपं घोषणा याये जक ल्यंदनि धयादीगु दु।
वय्कलं पार्टी तज्यात धाःसा थःपिनि पक्षया नेतृत्व मोहन बैद्य किरणं यानादी धकाः नं स्पष्ट यानादिल। क्रान्तिकारी पत्रकार संघया ग्वसालय् थौं सुथय् सिन्धुली जूगु पत्रकार भेटघाट ज्याझ्वलय् न्ववासें नेता गजुरेलं औपचारिक रुपं पार्टी तज्यात धकाः घोषणा याये जक ल्यं दनिगु व आः उगु ई वयेत ताः ई माली मखुत धयादिल।
केन्द्रीय समितिया बैठकय् पार्टी अध्यक्ष प्रचण्ड व उपाध्यक्ष डा. बाबुराम भट्टराई पक्षं असक्षमता प्रकट यानाः क्षमायाचन यात धाःसा पार्टी तमज्याइगु तसकं म्हो जक आशा यायेगु थाय् दनि धकाः नं वय्कलं धयादिल।
पार्टी दुने आः वालुवातारे पुचः व उकिया विरुद्ध थःपिनिगु विद्रोही पुचः यानाः निगू पुचः खनेदुगु जूसां पार्टी तज्यायेवं प्यंगू कुचा जुइ धकाः नं नेता गजुरेलं दावी यानादिल। वय्कलं थःपिनि पक्षं पार्टीया निर्णय लागू याना वयाच्वनागु तर अध्यक्ष प्रचण्ड व उपाध्यक्ष बाबुरामं उकियात उल्लंघन याना वनाच्वंगुलिं गबले तक अथे उल्लंघन याइगु ज्या दी मखु अबलय् तक नेतृत्वया आलोचना याना च्वनागु जुइ धकाः नं धयादिल। निगू लाईनं नं थःथःपिनिगु निर्णय लागू यानाः वनाच्वंगुलिं थ्व ताः ई तक जुइ मखु धकाः तकं नेता गजुरेलं स्पष्ट यानादिल।
