चिनीयाँ प्रमया भ्रमण स्थगित

स्थगनया कारण स्पष्ट मयाःनि
येँ(सन्ध्या टाइम्स)/चिनियाँ प्रधानमन्त्री वेन जियावाओया नेपाः भ्रमण स्थगित जूगु दु। थ्वहे वइगु पुस ५ निसें ७ गते तक वय्कलं नेपाः भ्रमण याइगु ज्याझ्वः दुगु खः। थुकिया लागिं थौं तकं नेपालय् थीथी कथंया तयारी यानाच्वंगु खःसा थौं हे तिनि आकाझाकां वय्कःया भ्रमण रद्द जूगु जानकारी नेपाःयात वःगु खः।
उच्चस्रोतं बिउगु जानकारी कथं चिनीयाँ पक्षं थःपिनिगु हे कारणं भ्रमण स्थगित याःगु खः। चीनपाखें छु कारण क्यनाः भ्रमण रद्द याःगु खः धइगु खँ धाःसा सी मदुनि।
वइगु पुस ५ गते वय्कः चिनीयाँ सरकारया झिम्ह मन्त्री सछिम्ह मनूया पुचः ज्वनाः नेपाः वयेगु तयारी यानाच्वंगु खः।
चीनया सुं नं प्रधानमन्त्रीं वंगु झिदँ लिपा नेपाः भ्रमण यायेत्यंगु थ्व न्हापांखुसी खः। वय्कलं थुगुसी नेपाः छगू जक देय्या भ्रमण यायेत्यंगुलिं चीनं नेपाःयात गुलि महत्व बियाः स्वयाच्वन धइगु खँ थुकिं स्पष्ट याःगु विश्लेषण जुयाच्वंगु खः।
वय्कःया नेपाः भ्रमण सफल यायेगु लागिं उपप्रधान लिसें परराष्ट्र मन्त्री नारायणकाजी श्रेष्ठ छुं ई न्ह्यः चीन झाःगु खः। थुगु भ्रमणया लागिं नेपालय् च्वनाः माःगु सम्पूर्ण तयारी ज्या वय्कलं हे याना च्वनादीगु खः।
थ्व भ्रमणय् नेपालं भारतनाप याः थें चीनलिसे नं बिप्पा सम्झौता यायेगु लिसें नेपाःयात अर्बौं तकाया ग्वाहालि यायेगु खँ जुयाच्वंगु खः। चीनलिसे यायेगु सम्झौताया लागिं नेपालय् व्यापक रुपं तयारी नं जुयाच्वंगु खः।
मधेसी मोर्चाया विरोध मू कारण
नेपाः वयेत्यंम्ह चिनीयाँ प्रधानमन्त्रीया भ्रमण रद्द जूगुया मू कारण सरकार सत्ता साझेदार मधेसी दलत खः धाःगु दु। चिनीयाँ प्रधानमन्त्री वेन जियाबाओ नेपाः भ्रमणय् वःगु इलय् चीनलिसे छुं नं कथंया तःधंगु सम्झौता याये दइ मखु धकाः मधेसी मन्त्रीतय्सं ख्याच्वः बियाहःगु कारणं चीनं थः प्रधानमन्त्रीया भ्रमण रद्द याकूगु खँ उच्चसूत्रं धाःगु दु।
म्हिगः तिनि मधेसी मोर्चाया नेतातय्सं प्रधानमन्त्री बाबुराम भट्टराईयात नापलानाः थःपिंलिसे जूगु ४ बुँदाया सम्झौता पालना यायेमाः, मखुसा सरकार त्वःतेगु जुइ धकाः ख्याच्वः बिउगुया मू रहस्य नं चिनियाँ प्रधानमन्त्रीया भ्रमण प्रभावित यायेत खः धाःगु दु।
थ्वहे भ्रमणया इलय् नेपालं चीनलिसे नं बिप्पा सम्झौता यायेगु तयारी यानाच्वंगु दु। चीनलिसे बिप्पा सम्झौता यायेत्यंगु भारतयात ययाच्वंगु मदु। उकिं भारतं मधेसी मोर्चायात न्ह्यःने तयाः यदि बिप्पा सम्झौता यात धाःसा सरकार क्वःथलेगु जुइ धकाः ख्याच्वः बीकूगु दावी नं सूत्रं याःगु दु। थःपिनि भ्रमणयात कयाः भारतपाखें उकथंया कासा म्हिताच्वंगु खँ सीकाः हे चीनं प्रधानमन्त्रीया भ्रमण रद्द याकूगु सूत्रया दावी दु।