माओवादी-मोर्चा गठबन्धनय् संकट

सरकार बारे पुनर्विचार यायेगु मधेसीया ख्याच्वः

येँ (सन्ध्या टाइम्स)/संयुक्त लोकतान्त्रिक मधेसी मोर्चां एकीकृत माओवादी व थःपिं दथुइ जूगु प्यंगू बुँदाया सहमति संकटय् लाःगु खँ धाःगु दु। थुकिं यानाः थ्वहे प्यंगू बुँदे सहमतिया जगय् गठन जूगु वर्तमान सरकार नं संकटय् लाःगु निष्कर्ष मोर्चां पिकाःगु खः। आः तक नं प्यंगू बुँदे सहमति कार्यान्वयन मजूगु व माओवादी उकिया जिम्मेवारीपाखें तापाना वंगु निष्कर्ष नं मोर्चां पिकाःगु दु ।

प्रम निवास वालुवाटारय् थौं सुथय् माओवादी व मधेसी मोर्चाया नेतातय् दथुइ जूगु सहलहय् मोर्चाया नेतातय्सं थ्व खँ न्ह्यःने हःगु खः। थ्व बारे खँ ल्हायेत हे थौं मोर्चां उगु बैठक सःतूगु खः। बैठकय् थःपिंसं ४ बुँदाया सहमति संकटय् लाःगु निष्कर्ष माओवादी समक्ष पेश यानागु खँ मधेसी जनअधिकार फोरम गणतान्त्रिकया अध्यक्ष जयप्रकाश प्रसाद गुप्तां संचारकर्मीतय्त कनादिल ।

मधेसी मोर्चां प्यंगू बुँदे सहमतियात कार्यान्वयन यायेगु निंतिं माओवादी नेतृत्वयात दबाब बीगु ज्या तकं याःगु दु। छुं जुयाः सहमति कर्यान्वयनय् बेवास्ता यात धाःसा गठबन्धनया विषयय् तकं पुनर्विचार याये मालीगु ख्याच्वः मधेसी नेतातय्सं बिउगु खः। मधेसी मोर्चा दुने आः सरकारय् च्वनाः च्वनेगु लाकि मच्वनेगु धइगु विषयय् गम्भीर मतभेद ब्वलना वयेवं मोर्चां सरकारया नेतृत्व यानाच्वंगु माओवादीलिसे सहलह ब्याकूगु खः। बैठकय् प्यंगू बुँदे सहमतियात आधार दयेकाः हे राष्ट्रिय सहमतिया सरकार गठन यायेगु धकाः निगू पक्षया नेतातय् दथुइ सहमति जूगु खः। मोर्चां समावेशी विधेयक, नेपाली सेनाय् १० हजार मधेसी दुथ्याकेगु खँ सुनिश्चित यायेमाःगु लगायत विषयत कार्यान्वयन यायेमाः धकाः बः बिउगु खः। अथे हे प्रधानमन्त्री डा. बाबुराम भट्टराईं मन्त्रिमण्डलया आकार तःधं याये माःगु मू कारण मधेसी मोर्चा खः धकाः दोष बिउगु खँयात कयाः नं मोर्चां आपत्ति प्वंकूगु दु ।

थ्व बारे निगू पक्षया नेतातय् दथुइ तःजिक हे सहलह जूगु खःसां उकी खास हे ठोस प्रगति जुइ मफुगु खँ नेता गुप्तां कनादीगु दु। बैठकय् संविधान च्वयेगु प्रक्रिया व विवादित विषयय् नं सहलह जूगु खः। लिपांगु इलय् वयाः प्रधानमन्त्री डा. बाबुराम भट्टराईं मधेसी मोर्चालिसे प्यंगू बुँदाया सहमति यायेमाःगु बाध्यता जक खः धकाः सार्वजनिक रुपं हे अभिब्यक्ति बिया वयाच्वंगु खँय् नं मोर्चाया नेतातय्सं आपत्ति प्वंकूगु दु ।

थ्वहे दथुइ माओवादी दथुइ जूगु प्यंगू बुँदे सहमतियात गुकथं सशक्त कार्यान्वयन याकेगु धइगु विषयय् सहलह ब्याकेत मधेसी मोर्चाया थौं सनिलय् बैठक च्वनीगु जूगु दु ।